2,178 total views
Isinulong ng Catholic Educational Association of the Philippines (CEAP) ang pagiging ligtas ng mga paaralan para sa mga mag-aaral, guro, kawani at iba pang bumubuo ng mga paaralan.
Nakiisa ang CEAP sa National Safe Schools Summit na isinagawa ng Department of Education (DepEd) sa Manila Science High School bilang bahagi ng pagpapalakas ng pagtutulungan ng iba’t ibang sektor para sa kaligtasan at mapatatag ang support system sa mga paaralan.
“The discussions highlighted that school safety extends beyond physical preparedness and includes safeguarding learners’ mental health, emotional well-being, and resilience during crises. Participants were encouraged to strengthen support systems in schools through collaboration among educators, parents, mental health professionals, local governments, and community partners,” ayon sa mensaheng binahagi ng CEAP.
Tinalakay sa summit ang mga hamon sa school safety, paghahanda sa sakuna, proteksyon sa mga mag-aaral, cyber-related concerns, at psychological first aid upang mapangalagaan ang mental at emosyonal na kalusugan ng mga mag-aaral at kawani ng paaralan.
Tiniyak ng CEAP ang pagsusulong sa “safe schools approach” program ng Department of Education.
Lumahok din ang CEAP sa Psychological First Aid Workshop kung saan tinalakay ang tamang pagkilala sa stress, pagbibigay ng agarang psychosocial support, at paggamit ng prinsipyong “Look, Listen, and Link” sa pagtulong sa mga mag-aaral at guro na naapektuhan ng mga emergency at iba pang traumatikong karanasan.
Ipinangako din ng CEAP ang pagsusulong ng mga programang naglalayong pangalagaan ang kaligtasan, dignidad, at kabuuang kapakanan ng bawat mag-aaral na isang adhikaing naaayon sa panawagan ni Pope Leo XIV na ang mga institusyong pang-edukasyon ay maging mga pamayanang nagtataguyod ng pag-asa, malasakit, at paghubog sa bawat tao.
