259 total views
Hinikayat ng opisyal ng Catholic Bishops’ Conference of the Philippines – Health Ministry ang mananampalataya na gunitain ang mga kapistahan ngayong Mayo na magpapalago sa pananampalataya at buhay-espiritwal.
Ayon kay Father Dan Cancino, M.I., executive secretary ng komisyon, kaakibat nito ang ibayong pag-iingat lalo na sa mga pagtitipon upang maiwasan ang posibleng hawaan ng coronavirus disease.
“Uulitin ko, sana isaisip natin na ang kapistahang ito ay magpalalim ng ating buhay pananampalataya. Nagpapalalim pero nasa isip at puso natin na nandoon pa rin ‘yung ating pagsunod sa minimum health protocols against COVID-19,” pahayag ni Fr. Cancino sa panayam ng Radio Veritas.
Sinabi rin ni Fr. Cancino na talagang nakatulong nitong mga nagdaang taon ng pandemya ang mahigpit na pagsunod sa mga panuntunan ng pamahalaan upang maiwasan ang hawaan ng virus.
Iginiit ng pari na ang minimum public health standards ay dapat nang maging bahagi ng pang-araw-araw na pamumuhay ng publiko upang matiyak ang patuloy na kaligtasan laban sa sakit.
“Tayo dapat ay laging maging vigilant para sa kalusugan. Hindi lang ng kalusugan mo, pero kalusugan din ng kapwa natin. This is our moral responsibility to also maintain and sustain the health of our brothers and sisters,” ayon sa pari.
Maituturing ang buwan ng Mayo bilang buwan kung saan ipinagdiriwang ang iba’t ibang kapistahan sa buong bansa.
Ito rin ang buwan na inilaan ng Simbahan sa pagpaparangal sa Mahal na Birheng Maria.
Sa nakalipas na dalawang taon, pansamantalang ipinagpaliban sa bansa ang pampublikong pagdiriwang ng mga kapistahan bilang pag-iingat laban sa pag-iral ng COVID-19 pandemic.