6,230 total views
Binatikos ni House Deputy Minority Leader at ACT Teachers Rep. France Castro si Vice President Sara Duterte sa pagtalikod sa mga hindi nareresolbang isyu sa Department of Education, na nag-iwan ng santambak na problema sa kahalili nitong si dating senador at ngayo’y kalihim na si Sonny Angara.
Inihayag ni Castro ang kaniyang pagpuna sa ginanap na pagdinig ng House Committee on Appropriations sa panukalang P793.18-billion budget ng DepEd at attached agencies para sa 2025. Ang Bise Presidente ay nagbitiw bilang kalihim ng DepEd noong July 19.
“In fairness naman kay Secretary Angara, teacher pa lang ako talagang malalim na ang pinagsamahan ng ACT Teachers at ni Secretary Angara. Si Secretary Angara, very accommodating, ang mga bills sa salary ng mga teachers ay talagang sinusuportahan niya. Ngayong Secretary na siya, mukhang mas maganda ito kesa noong nakaraan,” ayon kay Castro.
Mabilis namang inilipat ni Castro ang kaniyang tuon sa mga problemang minana ni Angara mula sa nakalipas na administrasyon.
“Kaya lang, Mr. Chair, nakakalungkot po, medyo iniwanan siya ng maraming problema ni Vice President Sara Duterte, lalong-lalo na po itong MATATAG curriculum,” pahayag pa ni Castro.
Ipinunto niya na ang kurikulum ay nagdulot ng malaking pahirap sa mga guro sa high school, na ngayon ay may 7-8 oras ng pagtuturo kada araw, na ang bawat klase ay tumatagal ng 45 minuto.”
“Talagang minaximize ang 6 hours,” ayon pa kay Castro, na binigyang diin ang labis na oras na pagtuturo ng mga guro.
Mungkahi ni Castro ang agarang pagrepaso ng MATATAG curriculum, na aniya’y minadaling ipinatupad na dahilan ng maraming problema.
“Iniwanan kayo ng nakaraang administration ng ganitong problema, ngayon ‘yung mga teachers talaga natin problematic dito, sobrang pahirap itong MATATAG curriculum,” saad pa nito.
Bukod dito, binigyan diin din ng mambabatas ang mga seryosong problema na tinukoy sa ulat ng Commission on Audit (COA) tungkol sa Computerization Program (DCP) ng DepEd.
“Medyo mahalaga sa akin ito, Madam Chair and Mr. Secretary, dahil gusto natin mabigyan ng laptop, mga computer ang ating mga teachers,” saad pa ni Castro, kaugnay na rin sa natuklasan ng COA tungkol sa mga pagkaantala, hindi pagkaka-deliver, at mga kakulangan sa loob ng programa, lalo na ang maling pamamahala ng mga package ng DCP.
Ikinabahala rin ni Castr ang tungkol sa mga hindi nabayarang remittance na umaabot ng higit sa P5 bilyon sa iba’t ibang ahensya, kabilang ang Bureau of Internal Revenue (BIR), Government Service Insurance System (GSIS), Philippine Health Insurance Corp. (PhilHealth), at Pag-IBIG Fund.
Ayon sa ulat ng COA para sa 2023, ang mga hindi naibabayad na buwis ay umabot sa P1.3 bilyon na utang sa BIR, P3.1 bilyon sa GSIS, P503 milyon sa PhilHealth, at P182 milyon sa Pag-IBIG.”
Iginiit ni Castro na ito ay malaking epekto sa mga teacher at non-teaching personnel, lalo na ang pagkakaantala ng remittances sa GSIS, na maaaring magdulot ng interes at surcharges sa kanilang mga account.
“Mahalaga po itong GSIS dahil pag na-late ang remittance ng premium loan sa GSIS, ang tatamaan ng mga interests ay ang mga teachers o ang mga non-teaching personnel,” babala pa ni Castro, na karagdagang pasanin sa mga kawani ng DepEd.
“Kung hindi nababayaran sa tamang oras, meron nang interest and surcharge against the account of the teachers or the non-teaching personnel,” dagdag pa niya, kasabay ang panawagan para sa agarang aksyon upang matugunan ang mga pinansyal na obligasyong ito.
Tiniyak naman ni Angara at iba pang mga opisyal ng DepED, na ang mga binanggit ng COA, lalo na ang mga hindi nabayarang buwis ay tinutugunan na ng kagawaran, sa pamamagitan ng isinasagawang reconciliation process.
Patungkol naman sa MATATAG curriculum, sinabi ni Angara, na kasalukuyan ng binabalangkas ang Department Oder kaugnay na rin sa hinaing ng mga guro.
