37,537 total reads
Inaanyayahan ng isang opisyal ng Catholic Bishops’ Conference of the Philippines (CBCP) ang mga mananampalataya na makiisa sa paglalakbay ng Panginoon ngayong Kwaresma sa pamamagitan ng pag-aayuno, penitensya, at malasakit sa kapwa.
Ito ang bahagi ng mensahe ni Lucena Bishop Mel Rey Uy – chairman ng CBCP-Episcopal Commission on Ecumenical Affairs, kaugnay ng paggunita ng Ash Wednesday ngayong ika-18 ng Pebrero, 2026 na hudyat ng pagsisimula ng panahon ng Kwaresma.
Ayon sa Obispo, sa pagsisimula ng panahon ng Kwaresma ay hinikayat ang lahat na gawing makahulugan ang pagtanggap ng abo sa noo bilang tanda ng pakikiisa sa paghihirap ng Panginoong Hesukristo.
“Sa pagsimula natin itong panahon ng Kwaresma, as we start with the Ash Wednesday, in putting ashes on our forehead, I invite you to journey with our Lord in His suffering through fasting and penance.” Bahagi ng pahayag ni Bishop Uy sa Radyo Veritas.
Binigyang-diin din ni Bishop Uy na ang pag-aayuno ay hindi lamang personal na sakripisyo kundi isang konkretong paraan ng pagtulong sa mga nangangailangan, lalo na sa pamamagitan ng Alay Kapwa campaign ngayong Kwaresma.
Pagbabahagi ng Obispo, mas magiging makabuluhan din ang pag-aayuno kung tutulong ang bawat isa sa mga kapus-palad ngayong Kwaresma lalo na sa pamamagitan ng pag-aalay ng abstinence tuwing Biyernes bilang tulong sa mga nagugutom sa pamamagitan ng Fast to Feed program ng Pondo ng Pinoy.
“Yung ating mga pagpa-fasting ay para makatulong tayo sa mga kapus-palad nating mga kapatid to the Alay Kapwa campaign during this Lenten season. And also for our fasting during Fridays, our abstinence during Fridays. We can have it as help also for those people who need food through the Fast to Feed program of the Pondo ng Pinoy.” Paanyaya pa ni Bishop Uy.
Paliwanag ni Bishop Uy, ang ganitong mga gawain ay konkretong pagpapakita ng pakikiisa kay Kristo at pagmamalasakit sa mga nasa laylayan ng lipunan.
Ipinapanalangin naman ng Obispo na nawa ay ang panahon ng Kwaresma ay maging tunay na biyaya para sa lahat.
“So, I hope that we join our Lord in His suffering by helping our brothers and sisters who are in need of assistance and also in need of food especially those in the periphery.” Ayon pa kay Bishop Uy.
Ang Ash Wednesday ang nagsisilbing hudyat sa pagsisimula ng panahon ng Kwaresma kung saan tuwinang pinaalalahanan ng Simbahan ang sambayanan na ang Kwaresma ay hindi lamang panahon ng pagsisisi, kundi ng aktibong pagpapamalas ng pag-ibig at pagkalinga sa kapwa na isang paraan ng pakikipaglakbay sa Panginoon ng pananampalataya na may mukha ng awa at malasakit sa kapwa.
