585 total views
Inaanyayahan ng Association of Catholic Shrines and Pilgrimages of the Philippines (ACSP), sa pahintulot ng Catholic Bishops’ Conference of the Philippines (CBCP), ang mga dambana, parokya, at pamayanang nakatalaga sa Mahal na Birhen ng Guadalupe, gayundin ang mga deboto ng Mahal na Birheng Maria sa bansa, na makiisa sa isasagawang pilgrimage bilang pakikiisa sa Novena Intercontinental Guadalupana 2023–2031.
Inilunsad ng grupo ang “La Guadalupana: A CBCP-ACSP Philippine Pilgrimage to Guadalupe and Notable Mexican Shrines” na isasagawa mula November 15 hanggang 24, 2026 sa Mexico.
Bahagi ito ng pakikibahagi ng CBCP sa pakikipagtulungan sa Conferencia del Episcopado Mexicano (CEM) para sa pagdiriwang ng ika-500 anibersaryo ng mga aparisyon ng Mahal na Birhen ng Guadalupe sa 2031.
Ayon sa ACSP, layunin ng pilgrimage na higit pang patatagin ang pananampalataya ng mga deboto at palalimin ang ugnayan ng mga Simbahan sa Pilipinas at ng Simbahan ng Mexico sa ilalim ng debosyon sa Birhen ng Guadalupe.
Kabilang sa mga nakatakdang gawain sa nasabing pilgrimage ang opisyal na pagdalaw at banal na misa ng delegasyon ng mga simbahan ng Our Lady of Guadalupe sa Basílica Nacional de Santa María de Guadalupe sa November 16, 2026.
Isasagawa rin ang pilgrimage at cultural exposure sa mahahalagang dambana sa Mexico mula November 17 hanggang 23.
Samantala, tampok din ang banal na misa bilang paggunita sa ika-400 anibersaryo ng paglalayag ng imahe ng Nuestra Señora de la Paz y Buen Viaje o Virgen de Antipolo, na gaganapin sa Catedral de Nuestra Señora de la Soledad sa Acapulco, Mexico sa November 20, 2026.
Pamumunuan ang nasabing pilgrimage ni Fr. Reynante Tolentino, ang kasalukuyang pangulo ng ACSP.
Sa mga nagnanais na makibahagi sa pilgrimage ay maaaring makipag-ugnayan kay Anna Lissa Ayo, chairperson ng ACSP Committee for Pilgrimages, sa pamamagitan ng mga numerong 0917-551-4468 at 0999-990-8108 o sa email na [[email protected]](mailto:[email protected]).
Patuloy naman ang panawagan ng ACSP sa mga mananampalataya na samantalahin ang pagkakataong ito upang higit na mapalalim ang debosyon sa Mahal na Birhen ng Guadalupe at makiisa sa pandaigdigang paghahanda para sa makasaysayang anibersaryo ng kanyang pagpapakita.
