586 total reads
Nanawagan ang Diocese of Novaliches ng mas malinaw, tuloy-tuloy, at aktibong pakikilahok ng Simbahan at mamamayan sa usapin ng pamamahala kasabay ng paglulunsad ng Novaliches Citizens Empowerment for National Transformation o NOVA-CENT.
Sa kanyang homiliya sa Cathedral Shrine Parish of the Good Shepherd noong March 22, iginiit ni Bishop Roberto Gaa na hindi na sapat ang panaka-nakang pakikilahok ng Simbahan, lalo na kung ito’y nalilimitahan lamang sa panahon ng halalan o sa gitna ng mga kontrobersiya.
“We cannot just be fence-sitters anymore. Ang pakikilahok ng simbahan ay dapat maging consistent… hindi ‘yung parang kabuti na lulubog at lilitaw,” ayon kay Bishop Gaa.
Ipinaliwanag ni Bishop Gaa na ang NOVA-CENT ay bunga ng synodality, ang sama-samang pakikinig at paglalakbay na isinasabuhay sa pamamagitan ng Conversations in the Spirit, at ngayon ay inilalapat hindi lamang sa buhay ng Simbahan kundi maging sa pamamahala at paghubog ng lipunan.
“It is a move towards good governance, towards national transformation,” ani Bishop Gaa.
Dagdag pa ng obispo, layunin ng inisyatiba ang pagpapaigting ng “critical collaboration” sa pagitan ng Simbahan at pamahalaan upang higit na mapaglingkuran ang mamamayan.
Samantala, binigyang-diin ni Fr. Antonio Labiao, Jr., vicar general for pastoral affairs ng diyosesis at lead convenor ng NOVA-CENT, na ang tunay na mabuting pamamahala ay nakasalalay sa aktibong pakikilahok ng mamamayan.
“Hindi puwedeng iasa lang sa mga leaders… Walang mangyaring good governance kung walang citizens’ participation,” pahayag ni Fr. Labiao sa Radyo Veritas.
Ayon sa pari, umiikot ang programa sa tatlong pangunahing hakbang: civic at political education, organizing, at community engagement, upang hubugin ang mamamayang mulat, organisado, at may kakayahang makilahok sa mga usaping panlipunan.
“May tatlo kaming engagement: anti-corruption, anti-political dynasty, electoral reforms,” ani Fr. Labiao.
Iginiit naman ni Bishop Gaa na ang synodal process ay hindi lamang para sa pagpili ng mga lider, kundi para sa mas malalim na pag-unawa at pakikialam sa kalagayan ng bayan.
“Hindi lang tayo pipili ng maayos na lider, kundi inaalam natin kung ano ang nangyayari sa ating bayan… Little changes, but deep little changes… kung consistent, malalim ang impact,” ayon sa obispo.
Binigyang-diin din nito na ang pagtutulungan ng mamamayan at pagpapatibay ng mga institusyon ang susi upang maiwasan ang katiwalian at maisulong ang kaayusan sa lipunan.
“Kung mapapagtibay ang mga institusyon… hindi magkakaroon ng lugar ang korapsyon… Nais ng simbahan na ang buong sambayanan… ay maging bahagi ng pagbangon,” ani Bishop Gaa.
Kabilang sa mga dumalo sa paglulunsad sina Quezon City Mayor Joy Belmonte at mga kinatawan ni Caloocan City Mayor Dale Gonzalo “Along” Malapitan, na kapwa saklaw ng diyosesis.
Kasabay rin nito ang panunumpa ng 55 sinanay na facilitators mula sa 14 na pastoral commissions na mangunguna sa pagpapalawak ng synodal conversations sa iba’t ibang komunidad.
Umaasa ang Diocese of Novaliches na sa pamamagitan ng synodality na inilalapat sa pamamahala, mapapalakas ang ugnayan ng Simbahan at pamahalaan at higit na mahihikayat ang bawat mamamayan na maging aktibong katuwang sa paghubog ng isang makatarungan at maayos na lipunan.
