26,394 total reads
Nanatiling ang matatag na pamilya ang isa pangunahing pananggalang laban sa pag-iwas sa pagkakalulong sa droga ng mga kabataan.
Ito ang binigyan-diin ni Pope Leo XIV sa pakikipagpulong sa mga kalahok sa 3-day conference na may temang “Faith-Based Response to Drugs and the Criminal Recruitment of Young People: A Dialogue from Latin America and the Caribbean to the World.”
“Today, we bear witness to the pain of many broken families, whether due to drug use, violence, the criminal recruitment of a child, poverty, or the lack of opportunities that push people to the margins of society,” paliwanag ni Pope Leo.
Kabilang din sa nakibahagi sa talakayan si Fr. Roberto Dela Cruz ng Sanlakbay para sa Pagbabagong Buhay-isang parish at community based rehabilitation ng simbahan sa Pilipinas para sa mga nalulong sa bisyo.
Ang Sanlakbay na itinatag noong 2016 ng noo’y arsobispo ng Maynila na si Cardinal Luist Antonio Tagle -ang kasalukuyang Pro-Prefect ng Vatican Dicastery for Evangelization, bilang tugon ng simbahan sa problema ng droga sa bansa at laban sa umiiral na drug war sa ilalim ng administrasyon ni dating Pangulong Rodrigo Duterte.
Binigyang-diin ni Pope Leo XIV na malaki ang tungkulin ng pamilya sa paggabay sa mga kabataan upang hindi malihis ng landas.
“The family, which the Second Vatican Council rightly called the ‘domestic church,‘ is the place where life is nurtured, cared for, and planned. There is no better defense against drugs than a good family,” ayon pa sa mensahe ng Santo Papa.
Ayon sa Santo Papa, maraming pamilya ang naaapektuhan at nasisira dahil sa droga, karahasan, kahirapan, pagsali ng mga kabataan sa mga grupong kriminal, at kakulangan ng oportunidad sa trabaho.
Hinikayat ng pinunong pastol ang ng pagbibigay-halaga muli sa pamilya bilang domestic church o tahanan kung saan nahuhubog, inaalagaan at ginagabayan ang mga anak.
Binigyang-diin din ni Pope Leo na hindi lamang ang taong nalulong sa droga ang dapat tulungan, kundi ay marapat ding suportahan ang pamilya at komunidad na nakapaligid sa kanya.
Hango rin ang pagtitipon sa mga karanasan ng dating Buenos Aires Archbishop Jorge Mario Bergoglio, na kalaunan ay naging si Pope Francis, sa pagtulong sa mga taong may problema sa droga at iba pang suliraning panlipunan.
Sa kanyang mensahe, muling binigyang-diin ni Pope Leo ang tungkulin ng Simbahan na maging malapit sa mga taong dumaranas ng paghihirap at tumulong na maiwasan ang pagkakalugmok ng mga kabataan sa droga at krimen.
