355 total reads
Hindi kumbinsido si Professor Ronald Simbulan – Vice Chairman ng Center for People Empowerment in Governance (CenPEG) na tunay na nailalahad ng mga kandidato ang kanilang mga plano at plataporma sa pamamagitan ng pakikilahok sa mga debate.
Paliwanag ni Simbulan, praktisado at kabisado na ng mga kandidato ang mga posibleng tanong at naangkop na sagot kung kaya’t hindi rin ito tunay na makatutulong sa pagsusuri ng mga botante sa kakayahan at plano ng mga kandidato na mamumuno sa bansa sa susunod na anim na taon.
“Practically parang naglalaban lang yung mga personalidad nila, nagtatagisan lang kasi yung mga sinasabi nila basically hindi naman talaga party platforms parang individual ano lang o kaya ano ang ibinulong sa kanila ng kanilamg mga advisers para maganda yung dating nung kanilang sagot, maganda para sa mga listeners and viewers…” pahayag ni Simbulan sa panayam sa Radio Veritas
Hinimok naman ni Simbulan ang mga botante na seryosohin ang pagkilatis sa mga kandidato lalo’t hindi biro ang anim na taon na panunungkulan sa pamahalaan.
Kaugnay nito, isa pang PiliPinas Debates 2016 ang nakatakdang isagawa ng Commission on Elections sa Luzon sa ika-24 ng Abril bilang bahagi ng mas pinaigting na kampanya ng kumisyon sa maayos at malinis na halalan.
Batay sa COMELEC Resolution No. 10002, mayroong 18,083 posisyon ang bukas para sa panunungkulan at pamumuno ng mga bagong lider na maihahalal ngayong darating na May 9 – National at Local Elections, kabilang na ang posisyon sa pagkapangulo, pangalawang pangulo, 12 senador, 59 na partylist representatives at higit 18-libong posisyon sa lokal na pamahalaan.
Sa tala tinatayang umabot sa higit 54.6 na milyon ang rehistradong botante na nakapagpatala para sa susunod na eleksyon bukod pa sa 1.3 milyong Overseas absentee voters.
Patuloy rin ang paghihikayat ng Catholic Bishops Conference of the Philippines (CBCP) sa publiko na huwag balewalain ang kasagraduhan ng pagboto, bilang isang mahalagang sangkap ng demokrasya at unang hakbang para sa pagbabago ng lipunan.
