433 total reads
Inaanyayahan ang sambayanang Filipino na maging mabuting tagapangalaga at tagapamahala ng kalikasan sa pagsisimula ng panahon ng paglikha o Season of Creation kahapon a-uno ng Setyembre 2016.
Ang selebrasyon ay pormal na binuksan sa pamamagitan ng isang banal na misa sa pangunguna ni Diocese of Novaliches Bishop Emeritus Teodoro Bacani Jr. Sa Immaculate Concepcion Cathedral sa Diocese of Cubao.
Ang pagdiriwang ng “season of creation” ay pinangunahan ng Radio Veritas, Global Catholic Climate Movement kaisa ang Ecological Justice Interfaith Movement, Franciscan Missionaries, CBCP NASSA/Caritas Philippines at Archdiocese of Manila Ecology Ministry and Disaster Response.
Sa banal na misa binigyang diin ni Bishop Bacani ang malaking pagmamahal ng Panginoon sa tao sapagkat hindi lamang mga rosas at maliit na hardin ang ipinagkaloob nito kundi ang buong sanlibutan upang maging ating tahanan na nagbibigay ng bawat pangangailangan ng tao.
“Magsaya tayo sapagkat alam nating minamahal tayo ng Diyos, hindi lang isang bungkos ng rosas ang ibinigay nya sa atin, binigyan nya tayo ng Fire, Water, Wind, Earth, binigyan nya tayo ng buong mundo. Hindi lang isang hardin, kundi mga bukirin, mga lupain, mga bundok, mga dagat. Alam ba ninyo kung bakit ibinigay sa atin? Sapagkat mahal tayo ng Diyos,” ang bahagi ng homilya ni Bp. Bacani, sa misa ng Season of Creation.
Sa huli, hinimok ng Obispo ang bawat isa na huwag lamang puro pananalangin, bagkus ay maging instrumento ang bawat tao sa pagpapaunlad at pangangalaga ng mundo.
Ibinahagi pa ni Bp. Bacani na palaging tandaan ang kahulugan ng MAPA.
“Pagdating sa mundo tandaan ninyo, MAPA… Mundo Ay Paunlarin, Alagaan… Manalangin tayo, at sabi nasa [nga], Diyos ang awa nasa tao ang gawa, Mundo Ay Paunlarin [at] Alagaan sa tulong ng Panginoon.”
Ang Season of Creation ay taunang ipinagdiriwang simula September 1 hanggang October 4.
Sa panahong ito tinatawagan ang 2.2 bilyong mga Kristiyano na manalangin at magbalik loob sa Panginoon sa pamamagitan ng pag-gawa ng mga kongkretong paraan na mangangalaga sa kalikasan.
Ngayong taon ang ika apat na pagdiriwang sa Season of Creation kasabay nito ang ikalawang taon ng World day of Prayer for Care of Creation o pandaigdigang araw ng Pananalangin para sa Pangangalaga sa sanilikha.
