1,624 total reads
Nakatakdang magsimula ang National Laity Week 2026 sa Diocese of Antipolo sa pamamagitan ng isang pilgrimage na naglalayong pag-isahin ang mga layko sa pananalangin, pagninilay at panibagong pagtatalaga sa kanilang misyon bilang mga mananampalataya.
Sa temang “Road of Hope,” inaanyayahan ng Sangguniang Laiko ng Pilipinas ang mga laykong Pilipino na maglakbay sa iba’t ibang pilgrim churches ng Diocese of Antipolo bilang bahagi ng pagdiriwang ng kanilang bokasyon at misyon sa Simbahan at lipunan.
Higit pa sa isang opening celebration, inilalarawan ng mga organizers ang pagtitipon bilang isang paglalakbay ng pananampalataya, pag-asa at misyon, kung saan magkakasamang mananalangin at magninilay ang mga layko habang tinutuklas muli ang kagandahan ng kanilang bokasyon.
“More than just an opening celebration. It is a journey—a pilgrimage of faith, hope, and mission. Come and walk with us on the Road of Hope as we visit and pray at the different Pilgrim Churches of the Diocese of Antipolo. Let us journey together, encounter the Lord, and rediscover the beauty of our vocation as lay faithful. Your presence matters. Your faith matters. Your mission matters.” Bahagi ng paanyaya ng SLP.
Layunin din ng pilgrimage na makatulong sa espirituwal na pagpapanibago ng mga layko upang mas maging matapang silang isabuhay at dalhin ang presensya ni Kristo sa kanilang mga pamilya, komunidad, lugar ng trabaho at sa mas malawak na lipunan.
“Let us gather as one Filipino Laity—praying together, journeying together, and being renewed together—so that we may go forth with greater courage to bring Christ into our families, communities, workplaces, and society.” Dagdag pa ng SLP.
Hinihikayat din ang mga layko na huwag lamang ipagdiwang ang kanilang bokasyon kundi aktuwal na isabuhay sa kanilang pang-araw-araw na buhay at pakikibahagi ang misyon ng Simbahan.
“This National Laity Week, let us not simply celebrate our vocation. Let us live it!” Ayon pa sa SLP.
Sa pamamagitan ng Road of Hope, inaanyayahan ang mga kalahok na sama-samang lumakad, manalangin at magpanibago bilang isang sambayanang layko, bago muling isugo upang maging saksi ng Ebanghelyo sa kani-kanilang pamilya at pamayanan.
Ang National Laity Week ay bahagi ng patuloy na pagkilala ng Simbahan sa mahalagang papel ng mga layko sa pagpapalaganap ng Ebanghelyo at sa pagpapanibago ng mundo ayon sa mga pagpapahalaga ng Kristiyanismo.
Magsisimula ang National Laity Week 2026 sa September 26, 2026 at magtatagal hanggang sa October 3, 2026.
Sa paglalakbay sa Road of Hope, inaanyayahan ng Sangguniang Laiko ng Pilipinas ang bawat layko na hindi lamang maging tagapagmasid ng misyon ng Simbahan kundi maging aktibong katuwang nito, dala ang pananampalataya, pag-asa at Ebanghelyo sa mundo.
