400 total views
Hinimok ni Taytay Palawan Bishop Broderick Pabillo ang mga Pilipino, Overseas Filipino Workers at Filipino Migrants na higit pang manalig sa Panginoon sa pagharap ng sambayanan sa mga suliranin sa ekonomiya dulot ng digmaan sa Middle East.
Ipinaalala ni Bishop Pabillo sa mga OFW na mahalagang maging mahinahon at manalig sa Diyos upang maipagpatuloy ang pagtataguyod sa pangangailangan ng pamilya sa Pilipinas.
Pinayuhan ng Obispo ang mga OFW na huwag mawalan ng pag-asa dahil kahit kailan hindi magwawagi ang kasamaan sa kabutihan
“Una po, marami tayong mga OFW na nagkatrabaho sa Middle East, maapektuhan ang kanilang trabaho at ang kanilang pinadadala sa kanilang mga pamilya. Ito mismo sa atin, tumataas na ang presyo ng langis, at susunod na ’yan ang presyo ng mga bilihin, ihanda po natin ang ating sarili sa paglala nito. Pero huwag tayong mawalan ng pag-asa, kasi alam naman natin na hindi magwawagi ang kasamaan. Lilipas din ang problemang ito,” ayon sa panayam ng Radyo Veritas kay Bishop Pabillo.
Hinikayat din ng Obispo ang mga Pilipino na mamuhay ng payak at lalu pang payabungin ang pananampalataya sa Panginoon.
Tinitiyak ng Obispo na kailanman ay hindi pababayaan ng panginoon ang kanyang sambayanan laban sa anumang uri ng krisis.
“Hindi tayo pababayaan ng Diyos. Kaya huwag pa tayong mawalan ng pag-asa, umasa tayo sa Kanya, na alam Niya ang nangyayari at may ginagawa Siya. Mas maging malalim sana ang ating pananampalataya, ang pananaligna rin ang ating lives. Baka may mga kailangan tayong baguhin, mga binibili natin, mga bagay na hindi naman natin kailangan. So baka rin, as simple as lives,” ayon sa panayam ng Radyo Veritas kay Bishop Pabillo.
Sa datos ng Department of Migrant Workers, umaabot sa dalawang milyon ang bilang ng mga OFW na apektado at maaring nanganganib ang buhay sa Middle-East dahil sa pag-usbong ng digmaan.
