5,500 total views
Ipinapanalangin ni former Philippine Ambassador to the Vatican Henrietta de Villa ang paggabay ng Espiritu Santo sa mga cardinal electors para sa gagawing Conclave simula ngayong May 7, 2025.
Ayon sa dating kinatawan ng Pilipinas sa Vatican, nawa ay maging bukas ang lahat ng mga cardinal electors sa paggabay ng Panginoon upang ganap na maihalal ang bagong punong pastol ng Simbahang Katolika na pinili ng Diyos upang magsilbing pastol ng kanyang kawan.
Paliwanag ni De Villa, mahalaga ang pananalangin ng bawat isa upang mapili at maihalal ng mga cardinal electors ang Santo Papang kinakailangan at tunay na makabubuti sa Simbahang Katolika sa kasalukuyang panahon.
“I have been praying since that 9-days Novendialis after Pope Francis died, I have been praying for God to send the Holy Spirit to guide the Cardinal Electors so that the Pope they will elect, they will choose will be the Pope good for our times and Pope that I know the Lord has already chosen, and that they will be open to the promptness of the Holy Spirit, and I’m sure they will be, because now it will have to be an act of God.” Bahagi ng pahayag ni De Villa sa Radyo Veritas.
Bahagi rin ng panalangin ni De Villa na magkaroon ang mga cardinal electors ng kaliwanagan ng isip tulad ng sa Panginoon upang maihalal ang bagong Santo Papa na magpapatuloy sa misyong kalingain ang mga dukha, at bigyang pag-asa ang daigdig na puno ng kawalang katiyakan, kaguluhan at hindi pagkakapantay.
“Especially yung mundo natin ngayon na hindi mo maintindihan, ako hindi ko talaga naiintindihan na of course dati pa yan na ang dami-daming gyera, ang dami-daming away hindi nagkakaintindihan pero ibang kultura yung tinatawag nilang ‘woke woke’ para bang God is being set aside, not only the poor or marginalized, those who are different but God himself is being set-aside and I pray to God ‘God take control, change your creation, make it new’ and I pray that that’s what the Holy Spirit do to the cardinal electors give them a new mindset, the mindset of God when they choose the Pope and I have great hope because the Lord hears the cry of the poor.” Dagdag pa ni De Villa.
Ngayong May 7, 2025 ang ika – 17 araw mula nang pumanaw si Pope Francis noong April 21, 2025 isang araw makalipas ang Pasko ng Muling Pagkabuhay ni Hesus.
Gaganapin ang conclave sa Sistine Chapel ng Vatican na mananatiling sarado sa publiko upang bigyang daan ang panahon ng pagninilay at pananalangin ng mga cardinal upang maihalal ang susunod na punong pastol ng Simbahang Katolika.
Magsisimula ang conclave sa pamamagitan ng pagdiriwang ng banal na misa sa umaga at sa hapon ang unang yugto ng botohan kung saan susunugin ang mga balota sa pagtatapos ng botohan, itim ang usok na lalabas sa Sistine Chapel kung wala pang napipili ang mga cardinal habang putting usok naman kung mayroon nang bagong Santo Papa ang Simbahang Katolika.
Sa kasalukuyan 133 mula sa 252 cardinal sa mundo ang kabilang sa tinaguriang cardinal electors na makalalahok sa pagpili ng bagong Santo Papa na magpapastol sa 1.4 na bilyong Katoliko sa buong mundo.
