776 total views
Nababahala ang opisyal ng Catholic Bishops’ Conference of the Philippines (CBCP) ang planong muling ipagpatuloy ang pagmimina sa Ipilan, Brooke’s Point, Palawan dahil sa maaaring maging epekto hindi lamang sa mga tao kundi maging sa kalikasan.
Ito ay ang nickel ore extraction project ng Lebach Mining Corporation na una nang sinuspinde ni dating Environment and Natural Resources Secretary at yumaong si Gina Lopez.
Ayon kay Puerto Princesa Bishop Socrates Mesiona, chairman ng CBCP-Episcopal Commission on Mission na sa pagpapatuloy ng pagmimina sa Brooke’s Point, muli na namang isasagawa ang pagbubungkal ng mga lupa sa kabundukan gayundin ang pagpuputol ng mga puno.
Sinabi ng Obispo, ito ang dahilan kung bakit ang Palawan ngayon ay madalas nang binabaha at lubos nang naaapektuhan ng iba’t ibang kalamidad, tulad na lamang ng nangyari noong manalasa ang Bagyong Odette.
“Ang kagubatan ay masasakripisyo na naman ng pagmimina. Marami na namang mga puno ang puputulin at bundok na papatagin at alam naman po natin ang epekto nito sa atin. Madalas na pong nakakaranas ng baha ang Palawan,” pahayag ni Bishop Mesiona sa panayam ng Radio Veritas.
Sinabi rin ni Bishop Mesiona na maliban sa mga likas na yaman, apektado rin ng pagmimina ang mga katutubo na sapilitang pinapaalis sa kanilang mga lupaing ninuno para maisakatuparan ang proyekto.
“May mga katutubo na namang maisasantabi at madi-dislocate dahil marami sa kanila ang nakatira sa kabundukan,” ayon sa Obispo.
Nauna nang nagpasa ng petisyon sa DENR ang mga katutubong komunidad ng Ipilan laban sa Lebach kung saan nakasaad na wala itong anumang katibayan ng pagpapahintulot mula sa komunidad at lokal na barangay batay na rin sa nakasaad sa Philippine Mining Act.
Panawagan naman ni Bishop Mesiona sa mga kinauukulan na dapat munang isaalang-alang ng mga makapangyarihang kumpanya at ng pamahalaan ang magiging epekto ng mga binabalak na proyekto bago ito tuluyang ipatupad.
Nakasaad sa Laudato Si ni Pope Francis na mahalaga ang pagiging mapagmatyag ng komunidad upang matiyak na wasto at may moral na pamantayan ang pamahalaan sa pagpapatupad ng mga batas na nangangalaga sa kalikasan.
