9,497 total views
Nanawagan si San Carlos Bishop Gerardo Alminaza at Pangulo ng Caritas Philippines, ng masusing paghahanap sa katotohanan at pananagutan kaugnay ng karahasang naganap sa Barangay Salamanca, Toboso, Negros Occidental na ikinasawi ng hindi bababa sa 19 na indibidwal noong Abril 19, 2026.
Sa kanyang panibagong pahayag na may titulong “Toboso: In the Search for Truth, Let No Life Be Diminished,” binigyang-diin ng obispo na ang insidente ay nag-iwan hindi lamang ng mga nasawi kundi ng mga tanong na nananatiling walang kasagutan.
Ayon kay Bishop Alminaza, mahalagang pakinggan ang lahat ng panig, mula sa mga awtoridad hanggang sa mga pamilya ng mga biktima, lalo na ang mga nasa laylayan na madalas hindi naririnig ang tinig.
“In situations like this, there is a temptation to choose sides too quickly—to cling to narratives that confirm our biases. Yet if we are to be faithful to truth, we must first learn to listen.” Bahagi ng pahayag ni Bishop Alminaza.
Binigyang-diin din ng Obispo ang hindi matatawarang dignidad ng bawat buhay ng tao, anuman ang kalagayan o paratang kung saan walang anumang bansag ang maaaring mag-alis sa dangal ng isang taong nilikha sa larawan ng Diyos.
Nanawagan naman si Bishop Alminaza ng isang malalim, patas, at transparent na imbestigasyon upang matukoy ang tunay na nangyari, kabilang ang proteksyon sa mga testigo at pamilya ng mga biktima.
“This is not a question of ideology. It is a question of truth. And truth requires more than statements—it requires credible, independent, and transparent investigation. We therefore call for: A thorough and impartial inquiry by appropriate institutions; Protection for witnesses and families seeking justice; Full transparency in the presentation of evidence.” Dagdag pa ni Bishop Alminaza.
Giit pa ng Obispo, ang pananagutan ay hindi laban sa mga institusyon kundi paraan upang mapatatag ang tiwala ng mamamayan.
Hinimok din ni Bishop Alminaza ang iba’t ibang sektor kabilang ang mga awtoridad, media, at mamamayan na gampanan ang kani-kanilang responsibilidad sa paghahanap ng katotohanan at pag-iwas sa disimpormasyon.
Samantala, binigyang-diin ng Obispo na ang tunay na kapayapaan ay nakaugat sa katarungan, at ang katarungan ay nagsisimula sa katotohanan.
Ayon kay Bishop Alminaza, “Accountability is not an attack on institutions. It is the means by which trust in those institutions is strengthened. Without truth, there can be no justice. Without justice, there can be no peace. The Responsibility of All. This moment also calls for responsibility from all sectors.”
