19,081 total reads
Isinusulong ni Marko Santiago, Director for External Affairs ng Deep Web Konek ang mas maayos na pagtutulungan sa pagitan ng pamahalaan at social media platforms upang mapalakas ang proteksyon sa mga kabataan laban sa online grooming at iba pang mapanganib na aktibidad.
Sa panayam kay Santiago sa Programang Barangay Simbayanan ng Radyo Veritas, sinabi ni Santiago na hindi lamang ‘Discord’ ang maaaring magamit sa grooming at radicalization, kundi maging iba pang madaling ma-access na social media platforms tulad ng Facebook at Messenger.
“Sa general use, useful naman ang Discord para sa proper communication, education, at collaboration with businesses. Ginagamit din ito ng mga estudyante, content creators,digital creators at freelance workers bilang bahagi ng kanilang trabaho at pagkakakitaan. Libre ang pangunahing paggamit nito, bagama’t may ilang advanced o updated features na may bayad. Kaya mahalaga ring tingnan na hindi lamang sa negatibong paggamit dapat nakatuon ang usapin tungkol sa platform,” ayon sa panayam ng programang Baranggay Simbayanan kay Santiago.
Ayon kay Santiago, mahalagang magkaroon ng proper investigation sa mga naitatalang kaso, gayundin ng maayos na koordinasyon sa mga platform upang matukoy at matugunan ang mga feature na maaaring magamit sa maling paraan.
Binigyang-diin din niya na bagama’t may mga panganib sa paggamit ng Discord, mayroon itong lehitimong gamit para sa communication, education, collaboration at pagkakakitaan ng mga estudyante, content creators, digital creators at freelance workers.
Matatandaang pansamantalang ipinagbawal ng Cybercrime Investigation and Coordinating Center (CICC) ang streaming at conference platform ng ‘Discord’ matapos i-ugnay sa mga ulat ng online grooming na naibalik naman kalaunan ang access dito kasunod ng mga reklamo mula sa mga gumagamit nito higit na mula sa mga propesyunal at educational sector.
“Unang-una, kailangan ng proper investigation sa mga kaso na ganito. Hindi lamang Discord ang may ganitong senaryo, dahil maaari rin itong mangyari sa Messenger, Facebook at iba pang social media networks. Ang pinakamainam na gawin ay magkaroon ng proper coordination sa mga social media platforms para maayos na matugunan ang mga ganitong problema. Kailangan nating magkaroon ng safeguards para hindi magamit ang mga platform sa panggugroom o pag-impluwensiya sa mga kabataan,” ayon sa panayam ng Radyo Veritas kay Santiago.
Ang ‘Discord’ ay isang online communication platform na ginagamit para sa text chat, voice at video calls, at group discussions.
Karaniwan itong ginagamit ng mga estudyante, content creators, professionals at iba pang users para sa komunikasyon, collaboration, education at trabaho.
