15,265 total reads
Kasama ang sambayanang Filipino, nakikiisa si Pangulong Ferdinand Marcos Jr. sa buong mundo sa pananalangin para sa agarang paggaling ni Pope Francis.
Ikinalulungkot ng Pangulong Marcos, ang kasalukuyang kalagayan ng Santo Papa dulot na rin ng kanyang karamdaman.
“Nakakalungkot na marinig ang malubhang karamdaman ni Pope Francis. Sa mga sandaling ito, kaisa tayo ng buong mundo sa panalangin para sa kanyang kalakasan at paggaling,” ayon pahayag ni Pangulong Marcos.
“Nawa’y patuloy siyang patnubayan at palakasin ng Panginoon upang magpatuloy sa kanyang misyon ng pananampalataya at pagmamahal sa sangkatauhan.”
Sa pinakahuling medical bulletin ng Vatican noong Linggo, nanatiling nasa kritikal na kondisyon ang Santo Papa dahil sa pneumonia.
Tumanggap siya ng dalawang unit ng concentrated red blood cells, na nagdulot ng positibong epekto, para tumaas ang kanyang hemoglobin.
Bagamat nananatiling matatag ang kanyang thrombocytopenia, may ilang pagsusuri sa dugo na nagpapakita ng maagang sintomas ng bahagyang paghina ng paggana ng kanyang mga bato.
Ang santo papa ay patuloy na sumasailalim sa high-flow oxygen therapy sa pamamagitan ng nasal cannulas.
Sa kabila ng kanyang kondisyon, ang Santo Papa ay nananatiling gising at may malinaw na kamalayan.
Una na ring nanawagan si Papal nuncio to the Philippines Archbishop Charles Brown sa mga Filipino ng pakikiisa sa pananalangin para sa pagbuti ng kalagayan ni Pope Francis.
Si Pope Francis ay dinala sa Gemelli Hospital dahil sa bronchitis noong February 14.
Matatandaang bumisita si Pope Francis sa Pilipinas noong Enero 15-19, 2015, kung saan milyon-milyong mga Pilipino ang dumalo sa kanyang mga misa at pagtitipon.
Kabilang sa layunin ng pagbisita ng pinunong pastol ng simbahan ang pakikiisa sa mga Pilipino, lalo na sa mga nasalanta ng Bagyong Yolanda (Haiyan) noong 2013.
