15,813 total reads
Pinaalalahanan ng Catholic Bishops’ Conference of the Philippines (CBCP) ang mamamayan na ang Pasko ng Pagsilang ni Hesus ay paalala ng patuloy na pakikilakbay ng Diyos sa sangkatauhan at ng Kanyang panawagan sa pagkakaisa at kapayapaan.
Ayon kay CBCP President Archbishop Gilbert Garcera, sa gitna ng mga hamong kinakaharap ng mundo—lalo na sa Pilipinas na nahahati dahil sa mga usaping pampulitika—ang pagdiriwang ng Pasko ay paanyaya ng Diyos upang muling buuin ang ugnayan ng tao sa kapwa at sa Diyos.
“Ang Diyos ay hindi nanatiling malayo. Siya ay lumapit upang pag-isahin tayo at ibalik ang magandang kaugnayan natin sa Diyos,” pahayag ni Archbishop Garcera.
Binigyang-diin ng arsobispo na si Hesus, ang nagkatawang-taong Salita ng Diyos, ang diwa at puso ng Pasko. Kaya naman mahalagang hayaang manahan si Kristo sa puso ng bawat isa at isabuhay ang Kanyang mga aral sa pang-araw-araw na buhay.
Tinukoy rin ni Archbishop Garcera ang patuloy na pagkakawatak-watak ng mga Pilipino na, ayon sa kanya, ay pinalalala ng laganap na korapsyon at ng pagpanig sa makapangyarihang mga political clan—mga salik na patuloy na sumisira sa pagkakaisa ng bayan.
Iginiit ng arsobispo na sa pagsilang ni Hesus ay isinakatuparan ng Diyos ang Kanyang pangako ng kaligtasan para sa sanlibutan.
“Ang Pasko ay kapistahan ng katuparan. Lahat ng ipinangako ng Diyos sa kasaysayan—ang paghihintay ng mga propeta, ang inaasam ng mga salinlahi, at ang daing ng sanlibutan sa gitna ng dilim—ay nagkaisa sa isang maningning na katotohanan,” ani Archbishop Garcera.
Pinaalalahanan din niya ang mamamayan na sa gitna ng karahasan, digmaan, at personal na mga pagsubok, naroroon si Hesus na patuloy na nakikilakbay sa sangkatauhan bilang bukal ng pag-asa at lakas ng loob.
Sa pagtatapos ng kanyang mensahe, hinimok ni Archbishop Garcera ang lahat na isabuhay ang Salita ng Diyos bilang gabay sa araw-araw na pamumuhay at pagkilos bilang sambayanan ng Diyos.
“Harinawa, ang galak ng Ebanghelyo ang magbigay-lakas sa atin upang patuloy tayong umusad bilang iisang bayan at sambayanan ng Diyos,” giit ng arsobispo.
