803 total reads
Inanyayahan ng pinunong pastol ng Archdiocese of Manila ang mananampalataya na hayaang manahan ang Espiritu Santo sa bawat isa para sa patuloy na pagmimisyon.
Ito ang mensahe ng Kanyang Kabunyian Jose Cardinal Advincula sa Dakilang Kapistahan ng Pentekostes kung saan hinamon ang bawat isang maggawad ng kapatawaran sa kapwa.
“Sa tulong ng Espiritu Santo, makakaya rin natin ito: kumilos para sa kapayapaan, maging tapat sa ating misyon at magpatawad sa maraming masamang karanasan sa kamay ng mga umusig at nagpahirap sa atin,” pahayag ni Cardinal Advincula sa Radio Veritas.
Sinabi ng cardinal na ang unang tatak at sangkap ng pamayanang pinakikilos ang Espiritu Santo ay kapayapaan na hatid ni Hesus sa Kanyang muling pagkabuhay na nagdudulot ng kaligayahan sa sangkatauhan.
Inihalimbawa ng arsobispo ang karanasan ng mga martir ng simbahan na patuloy ang magalak na pagpupuri sa Diyos sa kabila ng mga pang-uusig at paghihirap na naranasan dahil batid ang kapayapaang dala ng Panginoong muling nabuhay.
Pagbabahagi pa ni Cardinal Advincula ang ikalawang sangkap – ang pagmimisyon na higit ginampanan ng arkidiyosesis sa tulong ng Espiritu Santo lalo na noong panahon ng pandemya na labis ang hamong kinakaharap ng sangkatauhan.
“Sa simula ng pandemya, nagkaroon ng online retreat ang buong Archdiocese of Manila na may temang “Pentekostes: From crisis to renewal, from lockdown to mission.” Marami tayong hinarap na hamon sa hanapbuhay, pag-aaral. Napuno tayo ng takot at pangamba, tila inihanda tayo sa misyon natin. Hindi tayo makalabas dahil sa mga lockdown pero nakapaglakbay tayo sa ating kalooban,” ani Cardinal Advincula.
Isang mensaheng hatid ng Espiritu Santo sa sanlibutan ang pagpapatawad upang tuluyang manahan sa bawat puso ang Panginoon lalo na sa karanasan ng pandemya sa lipunan na nagdulot ng labis na pangamba at takot sa tao.
Hamon ng opisyal sa bawat isa na ihanda ang sarili sa pagbubukas ng puso para paglingkuran ang kapwa ayon sa nababatid ng Banal na Espiritu upang makapaghatid ng liwanag at pag-asa sa pamayanan.
“Hinihimok tayo ng Espiritu Santo na issayos ang ating pakikipag-uganayan sa Diyos at sa ating kapwa na madalas na nalalamatan ng kasalanan,” sinabi ng cardinal.
Ang Pentekostes ang pagbaba ng Banal na Espiritu 50 araw makalipas ang Muling Pagkabuhay ng Panginoong Hesukristo upang maghatid ng kapayapaan sa buhay ng tao at sa buong pamayanan.
