26,660 total reads
Sinuri ng Presidential Commission for the Urban Poor o PCUP ang mga oportunidad para sa livelihood program ng mga urban poor community sa pamamagitan ng paggamit ng buri at raffia sa Tubigon, Bohol.
Personal na binisita ni PCUP Commissioner Reynaldo Galupo ang ‘Tubigon Loom Weavers Multi-Purpose Cooperative’ na 34-taon nang gumagawa ng mga hinabing produkto mula sa ‘Buri’ fibers.
Tiningnan din ni Galupo ang Tubigon Raffia Gallery, Gasa sa Buli o Gift of the Buri Palm, isang tradisyon ng paghahabi ng raffia sa komunidad kung saan mula sa natural fibers ay nakakalikha ng mga bag, ilawan, basket at iba pang handicrafted products na nagpapakita ng husay at pagkamalikhain ng mga Boholano artisan.
Inihayag ni Galupo na pinag-aaralan ng P-C-U-P kung paano maaaring i-angkop ang kaalaman at kasanayan ng mga manghahabi sa Tubigon upang makalikha ng livelihood opportunities para sa mga urban poor beneficiary, partikular sa skills development, community-based production at paggamit ng mga likas na yaman na makukuha sa kanilang mga komunidad.
Ang inisyatibao ay alinsunod sa Memorandum of Understanding ng PCUP at Philippine Fiber Industry Development Authority o PHILFIDA, na layuning tuklasin ang fiber-based livelihood opportunities para sa mga nangangailangang komunidad.
Binigyang-diin ni Galupo na bahagi ito ng patuloy na paghahanap ng PCUP ng praktikal na kabuhayan na maaaring pagkakitaan ng mga pamilyang urban poor gamit ang mga kasanayang maaari nilang matutuhan at mga yamang mayroon sa kanilang komunidad.
Isinusulong ni Pope Francis sa kaniyang ensiklikal na ‘Laudato Si’ ang pangangalaga sa ating ‘common home’ kasabay ng pagbibigay kabuhayan at dignidad ng mga komunidad, lalo na sa pamamagitan ng responsable at makatarungang paggamit sa likas na yaman.
