12,786 total reads
Nanawagan ang Catholic Bishops’ Conference of the Philippines o CBCP ng pagkakaisa, diyalogo at pagtutulungan sa Mindanao matapos ang unang BARMM parliamentary elections.
Hinikayat ng CBCP ang mga bagong lider ng Bangsamoro na tiyaking magiging tahanan para sa lahat ang rehiyon at mapangalagaan ang dignidad, karapatan at kalayaan sa relihiyon ng bawat komunidad.
Binigyang-diin din ng kalipunan ng mga obispo ang kahalagahan ng mas malalim na ugnayan at pagtutulungan ng mga Muslim, Kristiyano, katutubo at iba pang komunidad para sa kapayapaan at kabutihang panlahat.
Ayon sa CBCP, kailangang harapin at paghilumin ang mga sugat na iniwan ng matagal na digmaan, kabilang ang sapilitang paglikas, diskriminasyon at mga kawalang-katarungan sa kasaysayan.
Hinimok din ang mga lider ng Simbahan at mga komunidad ng Muslim at katutubo na palakasin ang diyalogo at mga paraan ng pagtutulungan para sa kapayapaan.
Nanawagan din ang CBCP sa mga halal na lider ng BARMM na unahin ang kapakanan ng buong Bangsamoro, sa halip na pansarili o partidong interes.
