30,829 total reads
Tinugunan ng Radyo Veritas 846 ang pangangailangan ng mga residente ng Barangay Longos, Meycauayan, Bulacan na naapektuhan ng baha at masamang panahon nitong mga nakalipas na linggo.
Ayon kay Radyo Veritas 846 President Father Roy Bellen, bahagi ng ipinamahaging tulong ang pagtupad sa pangako ng himpilan sa komunidad kung saan matatagpuan ang bagong transmitter nito dahil ayon sa Pari nais ng Radyo Veritas na hindi lamang ang himpilan at mga tagapakinig nito ang makinabang sa kanilang presensya sa lugar, kundi maging ang mga mismong residente ng barangay.
Binigyang-diin niya na higit sa materyal na tulong, mahalagang maihatid sa mga benepisyaryo ang pananampalataya at pag-asa sa gitna ng mga pagsubok.
“Kaya bukod po sa mga materyal na tulong, ’yun pong tulong ng pananampalataya at pag-asa ang atin pong hatid para po sa ating mga kababayan,” ayon sa panayam ng Radyo Veritas kay Father Bellen.
Samantala, pinasalamatan ni Barangay Longos Captain Arnel Gutierrez ang Radyo Veritas at si Father Bellen sa patuloy na pagtugon sa pangangailangan ng mga residente tuwing may kalamidad.
Ayon sa opisyal, ipinamahaging tulong ang mga pangunahing pangangailangan ng mga residenteng naapektuhan ng baha. Binanggit din niya na bago pa man maitayo ang transmitter ng Radyo Veritas sa lugar ay nangako na ang himpilan na tutulong sa komunidad sa panahon ng kalamidad.
“Maraming-maraming salamat po kay Father Bellen na kung natatandaan po ninyo nung araw, bago pa lang ito ginagawa eh nakapangako po sila na ’pag merong ganitong kalamidad eh tutulong daw po sila,” ayon naman sa Panayam ng Radyo Veritas kay Gutierrez.
Lubos naman ang pasasalamat ni Zenaida Bergania, pangulo ng FISCAP Senior Citizens ng Meycauayan, sa Radyo Veritas para sa tulong na ipinagkaloob sa mga senior citizen at iba pang residente ng Barangay Longos.
Ayon kay Bergania, malaking bagay ang natanggap nilang ayuda matapos ang mga naranasang epekto ng mga nagdaang bagyo at habagat, Kabilang sa mga benepisyaryo ng isinagawang pamamahagi ang mga residente ng Barangay Longos.
“Ah sa dinanas po namin nung nakaraang bagyo’t habagat, malaking bagay po ito na ipinagkaloob sa amin,” ayon naman sa panayam ng Radyo Veritas kay Bergania.
Patuloy na isinusulong ng Radyo Veritas 846 ang pagtulong sa mga komunidad na nangangailangan, kasabay ng paghahatid ng mensahe ng pananampalataya at pag-asa sa mga pamilyang dumaranas ng pagsubok.
