359 total views
Tiniyak ng Rotary Club Makati ang patuloy na pagsuporta sa misyon ng Sanlakbay Drug Rehabilitation na parish-based drug rehabilitation program ng Archdiocese of Manila.
Kabilang ang kanilang naturang pagsuporta sa “Sanlakbay Para sa Pagbabagong Buhay” sa itinuturing ng Rotary Club Makati na legasiya para sa kanilang nalalapit na paggunita ng 60th Charter Celebration sa ika-13 ng Marso, 2026.
Taong 2017 ng unang makipagtulungan ang Rotary Club Makati sa Archdiocese of Manila upang masuportahan ang programa ng Simbahan na Sanlakbay Drug Rehabilitation na naglalayong matulungan ang mga drug-dependents na makapaghilom at makapagbagong buhay.
“In 2017, RC Makati partnered with the Archdiocese of Manila to support the parish-based drug rehabilitation program “Sanlakbay Para sa Pagbabagong Buhay” (One Journey Towards a Renewed Life), which helps drug dependents who voluntarily surrendered to authorities begin a path towards their recovery.” Bahagi ng pahayag ng Rotary Club Makati.
Pagtiyak ng Rotary Club Makati, makakaasa ang Sanlakbay Drug Rehabilitation sa kanilang patuloy na pagtulong sa pamamagitan ng mga donasyong kagamitan at suporta sa programa.
Naniniwala ang Rotary Club Makati na mahalaga ang misyong ginagampanan ng Sanlakbay Drug Rehabilitation na nakabatay sa habag, walang kundisyong pagmamahal sa kapwa, at pananampalatayang Kristiyano, na nagbibigay ng gabay at suporta para sa mga indibidwal na naghahangad ng panibagong buhay.
“Grounded in compassion, unconditional love, and the Christian faith, the program provides guidance and support for individuals seeking a renewed life. RC Makati continues to assist Sanlakbay through equipment donations and program support.” Dagdag pa ng Rotary Club Makati.
Una ng binigyang diin ni Rev. Fr. Roberto ‘Bobby’ Dela Cruz, Priest-in-Charge ng Restorative Justice Ministry ng Archdiocese of Manila na nangangasiwa sa programang SANLAKBAY, na mahalaga ang pagtutulungan ng iba’t ibang institusyon ng lipunan upang mapanumbalik ang tiwala at kapanatagan na kinakailangan para makapagbagong buhay ang isang nalulong sa pinagbabawal na gamot.
Ang “SANLAKBAY para sa Pagbabagong Buhay” ay ang parish-based drug rehabilitation program ng Archdiocese of Manila na itinatag noong 2016 bilang paraan ng pagtugon ng Simbahang Katolika sa suliranin ng pagkalulong sa illegal na droga ng ilang mamamayan.
