18,595 total reads
Nilinaw ng Church Leaders Council for National Transformation (CLCNT) ang layunin at adhikain ng nakatakdang malawakang pagkilos laban sa katiwalian sa September 21, 2025 sa EDSA People Power Monument.
Ayon kay Rev. Fr. Albert Delvo – Pangulo ng Manila Ecclesiastical Province School Systems Association (MaPSA) at isa sa mga convenor ng CLCNT layunin ng malawakang pagkilos na ipakita ang sama-samang paninindigan ng lahat laban sa talamak na katiwalian na nagaganap sa lipunan.
Giit ng Pari, walang halong pulitika ang nakatakdang pagkilos na hindi naglalayong pabagsakin ang kasalukuyang administrasyon at hindi rin nananawagan sa pagpapauwi sa bansa ni dating Pangulong Duterte.
Paliwanag ni Fr. Delvo, tanging pagpapanagot sa lahat ng mga magkakasabwat sa pagnanakaw sa kaban ng bayan ang layuning ipapanawagan ng nakatakdang National Day of Action Against Corruption na tinaguriang ‘Trillion Peso March.’
“Ang Church Leaders Council for National Transformation (CLCNT) ay inorganisa at isinusulong nito ang laban sa korapsyon, so hindi nasa loob ng agenda namin na pauwiin ang dating Pangulong Duterte, hindi din kasama sa loob [ng agenda namin] na panagutin si Pangulong Marcos o patalsikin si Pangulong Marcos hindi po, at saka hindi din po ito inorganisa para pabagsakin ang current administration absolutely no.” Bahagi ng pahayag ni Fr. Delvo sa Radyo Veritas.
Una ng inihayag ng CLCNT na layunin ng nakatakdang gawain ang ipapanawagan ang pananagutan sa talamak na katiwalian sa pamahalaan, partikular na ang bilyon-bilyong pisong pondo na nasayang dahil sa unfinished, ghost at substandard flood-control project ng Department of Public Works and Highways (DPWH), kung saan kabilang sa mga isinasangkot ang ilang opisyal ng gobyerno mga kongresista, senador at mga contractors.
Hinihikayat ang mga nais na dumalo sa pagkilos na magsuot ng puting damit upang ipakita ang pagkakaisa ng lahat para sa katarungan, katotohanan at kapakanan ng bayan(
