566 total reads
Nakatakdang ibahagi ng drug rehabilitation program ng Archdiocese of Manila na “SANLAKBAY para sa Pagbabagong Buhay” ang paraan ng pagtugon ng Simbahang Katolika sa Pilipinas sa pagkalulong sa illegal na droga sa 3-Day International Conference on Drugs and Addictions sa Vatican.
Ito ang kinumpirma ni Rev. Fr. Roberto ‘Bobby’ Dela Cruz, Priest-in-Charge ng Restorative Justice Ministry ng Archdiocese of Manila na nangangasiwa sa programang SANLAKBAY kaugnay sa pambihirang paanyaya ng Vatican.
“Yes, I’m here. The conference will start on the 29th until Dec 1…” pahayag ni Rev. Fr. Roberto ‘Bobby’ Dela Cruz sa Radyo Veritas.
Ayon sa Pari, lubos ang kagalakang nadarama ng mga bumubuo sa SANLAKBAY sa pambihirang imbitasyon ng Vatican’s Dicastery for Promoting Integral Human Development upang maibahagi sa pagtitipon ang kanilang mga hakbang at pamamaraan sa pagtugon sa mga pangangailangan ng mga sumukong drug dependents sa Pilipinas.
Nilinaw naman ni Fr. Dela Cruz na hindi lamang usapin ng pagkalulong sa ilegal na droga ang tatalakayin sa loob ng 3-araw na kumpirensya kundi maging ang pagkakalulong sugal, pakikipagtalik, pornograpiya at iba pa na nangangailangan ng aktibong pagtugon ayon na rin kay Pope Francis
“I and the team are happy and honored to be invited and contribute to this conference which will help us to understand and to search more appropriate response to the deadly phenomenon of addiction. Addiction (not only DRUGS) is a PHENOMENON constitutes a worrisome problem in the world today. It requires the society an act of Courage as Pope Francis said.” Pagbabahagi pa ni Father Dela Cruz.
Inihayag ng Pari na bagamat isang magandang pagkakataon ang pagtitipon upang maipakilala ang SANLAKBAY sa isang pandaigdigang kumperensya ay isa rin itong pambihirang opurtunidad upang mamulat at magkaroon pa ng mga karagdagang kaalaman mula sa mga organisasyon sa iba’t ibang bansa na mayroon ring programa tungkol sa drugs at addictions.
“A serious study and action with the experiences that will come out from this conference will surely complement our efforts in our intervention.” Saad ni Father Dela Cruz.
May titulo ang pagtitipon na “International Conference on Drugs and Addictions, An Obstacle to Integral Human Development” na gaganapin sa Vatican’s Synod Hall mula ika-29 ng Nobyembre hanggang unang araw ng Disyembre.
Makakasalamuha ng mga delegado ang Kanyang Kabanalan Francisco.
Opisyal na inilunsad ang Catholic Church-based drug rehabilitation program na SANLAKBAY para sa Pagbabagong Buhay noong ika-23 ng Oktubre taong 2016 sa pangunguna ni Manila Archbishop Luis Antonio Cardinal Tagle bilang tugon ng Simbahan sa kampanya ng administrasyong Duterte laban sa illegal na droga at pagdideklara ni Pope Francis noong 2016 ng Year of Mercy.
Kabilang sa programa ng SANLAKBAY para sa mga sumukong drug dependents at sa kanilang mga pamilya ay ang pagkakaloob ng counselling, spiritual formation, skills formation training at arts, culture at sports activities naman para sa holistic development ng mga drug dependents.
Bahagi rin ng rehabilitation program ng SANLAKBAY ang pagbibigay ng paralegal assistance, livelihood training, medical assistance at religious studies tulad ng Bible study at catechesis upang makapagbalik loob ang mga drug surrenderers.
Batay sa datos ng Dangerous Drugs Board tinatayang nasa 1.3-milyon ang bilang ng mga gumagamit ng ilegal na droga sa Pilipinas.
Matatandaang nauna ng inihalintulad ng Kanyang Kabanalan Francisco na bagong uri ng pang-aalipin ang drug addiction at iba pang uri ng adiksyon na dapat tugunan ng bawat bansa sa pamamagitan ng edukasyon at rehabilitasyon.
