453 total reads
Pinaalalahanan ni Manila Auxiliary Bishop Broderick Pabillo ang mga mananampalataya na tuwinang isaisip ang huling yugto o kahahantungan ng ating buhay.
Ayon kay Bishop Pabillo sa kaniyang Pastoral Visit sa Radio Veritas, ito ang magiging gabay ng bawat isa sa pangangalaga ng kaluluwa at malayo sa kasalanan.
“Ang kamatayan ay hindi katapusan. Pagkatapos ng ‘death’ nandiyan ang judgment haharap tayo sa Diyos,” ayon kay Bishop Pabillo.
Ipinaliwanag ng Obispo na matapos ang kamatayan ay ang paghuhukom o paghahatol kung saan ang magiging hantungan sa langit o sa impiyerno.
Iginiit ng Obispo na dapat gamitin ang pagkakataon ng pamumuhay sa lupa para bigyang pagpapahalaga ang buhay, ang pagbabago at pagpapatawad.
“To think of death make us value life more. And we will become more courageous. Kasi we are at home when we died. Alam na natin ang kamatayan, handa na tayong mamatay. At hindi na tayo natatakot sa buhay,” ayon kay Bishop Pabillo na siya ring Chairman ng CBCP-Episcopal Commission on the Laity.
Ayon sa Obispo, sa kasalukuyang mundo ay tila walang katarungan subalit ang lahat ay huhusgahan sa kamatayan sa pagharap sa Panginoon sa pagtanggap sa katarungang paghatol at banal na awa ng Diyos.
Inaanyayahan din ni Bishop Pabillo ang bawat mananampalataya na magkaroon ng panahon sa pagninilay para sa pagsusuri sa sarili at magkaroon ng pag-unawa sa patuloy na pagbabagong loob tungo sa Diyos.
