594 total reads
Hindi sang-ayon si Senator Antonio Trillanes IV sa naging kasunduan ng Pilipinas at China kaugnay sa ‘oil and gas development’.
Ayon sa mambabatas, base sa Memorandum of Agreement (MOU) na kabilang sa 29 na kasunduan na nilagdaan ng dalawang bansa ay binibigyan ng karapatan ang China sa mga isla na pag-aari ng Pilipinas.
“Itong MOU ng Philippines and China, maling-mali po ito dun sa anggulo wording ng MOU na ‘yun na it will cover relevant maritime areas daw. Mali po yung wording na ‘yun kasi ibig sabihin nun pati kunwari ang eastern coast natin sa may pacific side…’yung Benham Rise, ibig sabihin puwede pa rin silang may claim doon nirecognize natin. Dapat doon lang yan sa disputed maritime areas. For example, dun sa Kalayaan islands group kung saan nag-o-overlap yung iba’t ibang territorial waters,” ayon kay Trillanes sa panayam ng Radio Veritas.
Naunang iginiit ni CBCP Permanent Committee on Public Affairs Executive Secretary Father Secillano na dapat isapubliko ng administrasyong Duterte ang nilagdaang kasunduan sa China.
Read: Administrasyong Duterte, hinimok na maging transparent sa kasunduan sa China
Iginiit ng mambabatas na base sa kasunduan kabilang sa mga saklaw ang mga mahahalagang maritime areas sa gagawing exploration.
Kabilang na dito ang mga ‘disputed islands’ at mga islang pag-aari ng Pilipinas tulad ng Benham Rise at Scarborough Shoul- na idineklara naman ng arbitration court bilang pag-aari ng bansa.
Dagdag pa ni Trillanes ang ginawa ng gobyerno ay hayagang pagbebenta sa interes at teritoryo ng bansa.
Inihayag ng mambabatas na dalawang araw bago ang pagbisita ni Chinese President Xi-Jinping ay nagsumite na sila ng resolution makaraang malaman na ang China ang gumawa ng draft ng MOU.
Sa isang mensahe ni Pope Francis sinasaad sa katesismo ng simbahan na ang kayamanan ng mundo ay nilikha para sa kapakanan ng lahat bagama’t binibigyang pagkilala ang karapatan sa pagmamay-ari.
Paliwanag ng Santo Papa, nilikha ang mga kayamanang ito hindi lamang para sa iilan kundi maging paraan ng bawat isa sa pagbabahagi sa kapwa at kabutihan ng mas nakakarami lalu na sa mahihirap na sa matagal nang panahon ay napag-iiwanan ng pag-unlad.
