1,167 total reads
Iginiit ni Manila Archbishop Jose Cardinal Advincula na ang tunay na “Buen Suceso” ay hindi magandang kapalaran o buhay na walang kinakaharap na mga pagsubok, kundi ang pagkakatagpo kay Hesukristo at pananatili sa kanya sa gitna ng mga pagsubok.
Sa kanyang homiliya sa ika-401 kapistahan at pagdambana ng Nuestra Señora del Buen Suceso sa St. Andrew Cathedral sa Parañaque City nitong Agosto 10, sinabi ni Cardinal Advincula na hindi ipinapangako ng debosyon kay Maria ang buhay na walang paghihirap, kabiguan at masasamang pangyayari.
“Mary does not bring us good fortune in the sense of good luck. Mary brings us, Jesus. Jesus is our real ‘Buen Suceso.’ To find him is the best thing that can happen to us,” ayon kay Cardinal Advincula.
Binigyang-diin ng kardinal na ang pagiging pinagpala ay hindi nangangahulugang magiging madali ang lahat ng bagay sa buhay.
“A blessed life is not a life without suffering. A successful life is not a life without failure. A life of faith is not a life protected from every bad event,” aniya.
Sa halip, sinabi ni Cardinal Advincula na ang tunay na buhay ng pananampalataya ay ang patuloy na pagtitiwala sa Diyos kahit nahaharap sa mga sitwasyong hindi inaasahan o hindi ninanais ng tao.
“A life of faith is a life in which God remains with us through everything, and we continue to entrust ourselves to God with childlike confidence despite everything,” dagdag pa ni Cardinal Advincula.
Paliwanag ni Cardinal Advincula na maging ang mga pangyayaring tila kabiguan ay maaaring maging bahagi ng plano ng Diyos, gaya ng krus ni Hesus na naging daan tungo sa muling pagkabuhay.
Ayon sa kardinal, hindi rin laging ang pagbabago ng sitwasyon ang sagot ng Diyos sa panalangin sa halip ay binabago ng Panginoon ang tao.
“Sometimes we pray for God to change our circumstances. And sometimes he does. But at other times, God changes us in the midst of our circumstances,” giit ng kardinal.
Samantala, pinagtibay naman ni Fr. Lamberto Legaspino, rector at parish priest ng Diocesan Shrine of Nuestra Señora del Buen Suceso, ang kahalagahan ng mensahe ni Cardinal Advincula lalo na sa kasalukuyang kalagayan ng lipunan.
Sa panayam sa Radyo Veritas, hinikayat ni Fr. Legaspino ang mga mananampalataya na bumaling kay Maria sa gitna ng paglaganap ng kasinungalingan at katiwalian sa lipunan.
“How I pray that what’s happening in our society nowadays, with so many lies and corruptions, that the people will turn to Mary. Because Mary is the mother of truth. Mother of Jesus Christ,” pahayag ni Fr. Legaspino.
Ayon sa pari, ang paglapit kay Maria ay umaakay sa tao patungo kay Hesus, na siyang katotohanan ng buhay.
Binigyang-diin nito na sa pagkakatagpo kay Kristo matatagpuan ang tunay na kahulugan ng Buen Suceso.
“When you go to Mary, you will find good events in life because all things will be good events with Jesus Christ,” giit ng pari.
Noong 1625, nang dumating sa Parañaque ang imahen ng Nuestra Señora del Buen Suceso, na ipinagkatiwala sa mga Agustino.
Mula noon, lumaganap ang debosyon sa Mahal na Birhen at naging patrona ng lunsod.
Ngayong 2026, ipinagdiriwang ang ika-401 taon ng debosyon sa Nuestra Señora del Buen Suceso at ang pagtatapos ng Jubilee year para sa ikaapat na siglong pamamatnubay ng Mahal na Birhen sa mga deboto.
