3,732 total reads
Inatas ng Malacañang ang agarang pagsasagawa ng imbestigasyon sa sinasabing substandard o depektibong bollards na naka-lagay sa Ninoy Aquino International Airport (NAIA) Terminal 1.
Ang kautusan ay kasunod ng naganap na insidente kung saan dalawang katao ang nasawi, kabilang na ang isang 5-taong gulang na batang babae matapos masagasaan ng SUV.
Batay sa inisyal na ulat, sinasabing nawalan ng kontrol ang driver ng SUV at sumalpok sa mga bollards sa labas ng paliparan.
Sa halip na mapigil ang sasakyan, ay nagpatuloy ito sa pag-andar at bumangga sa mga taong nasa paligid, na nagresulta sa pagkasawi ng dalawa at pagkakasugat ng ilan pang indibidwal.
Isa sa mga tinutukoy na posibleng sanhi ng insidente ay ang mahinang kalidad ng bollards na hindi nakapagsilbing epektibong harang.
Ang bollards ay isang posteng harang na inilalagay sa mga pampublikong lugar tulad ng bangketa, kalsada at paliparan, na nagsisilbing proteksyon sa mga gusali at pedestrian upang pigilan ang mga sasakyan.
Ayon kay Presidential Communications Office (PCO) Undersecretary Atty. Claire Castro, ikinalulungkot ng pamahalaan ang insidente, lalo na kung mapatutunayang ang mga bollards ay hindi tumugon sa nararapat na pamantayan ng kaligtasan.
Ang naturang bollards ay na-install noong Hulyo 2019 sa ilalim ng nakaraang administrasyon, partikular sa panahon ng dating Department of Transportation (DOTr) Secretary Arthur Tugade.
“Sa direktiba ng Pangulo, iniimbestigahan na ang proseso ng procurement at ang mga teknikal na detalye ng nasabing proyekto,” ani Castro. “Kaagad ding inatasan si Secretary Vince Dizon na pangunahan ang pagsusuri sa kasalukuyang mga bollards at tiyakin ang kanilang agarang pagpapalit upang mapangalagaan ang kaligtasan ng publiko.”
Iginiit ni Castro na hindi palalagpasin ng administrasyon ang anumang uri ng kapabayaan, lalong-lalo na kung ito ay may kaugnayan sa katiwalian sa mga kontrata ng pamahalaan.
