279 total views
Iginiit ni Kalookan Bishop Cardinal Pablo Virgilio David na ang natatanging pagkakaiba-iba ng Asya ang mahalagang ambag nito sa pandaigdigang Simbahan.
Ito ang mensahe ng kardinal sa panawagan ni Pope Leo XIV na maging instrumento ng pagbubuklod ng pamayanan at hindi taga-paghasik ng pagkakahati-hati.
Sa pagninilay ng kardinal sa mensahe ng Santo Papa para sa ika-12 Plenary Assembly ng Federation of Asian Bishops’ Conferences (FABC) sa July 20 hanggang 26, sinabi nitong ang mayamang pagkakaiba-iba ng mga mamamayan, kultura, at relihiyon sa Asya ay nagsisilbing lakas upang isulong ang pagkakaisa.
“Asia has always been a continent of extraordinary diversity. Perhaps for that very reason, she has something important to offer the universal Church: not uniformity, but communion; not conquest, but encounter; not walls, but bridges,” ayon kay Cardinal David.
Binigyang-diin ng vice president ng FABC na ang mensahe ni Pope Leo XIV ay malinaw na paanyaya sa Simbahan na yakapin ang synodal conversion at patuloy na maging instrumento ng pagkakaisa sa gitna ng isang mundong nahaharap sa mga hidwaan at pagkakahati-hati.
“The Holy Father speaks of the Church as a builder of communion rather than an architect of Babel,” ani Cardinal David.
Ayon sa kardinal, ang panawagan ay kaakibat ng paalala ng Santo Papa na ang bawat pagpapasya ng Simbahan ay dapat naaayon sa kalooban ng Diyos at laging nakatuon sa kapakanan ng tao.
“He invites us to place God at the horizon of all our decisions and the human person at their center,” aniya.
Hinikayat din ni Cardinal David ang Simbahan na huwag matakot harapin ang mga hamon ng kasalukuyang panahon at makibahagi sa pagtataguyod ng kabutihang panlahat.
“He encourages us not to be afraid of getting our hands dirty on the building site of today’s world,” dagdag pa nito.
Inihayag ng kardinal na si Hesukristo ang sentro ng tunay na synodal conversion dahil Siya ang nag-uugnay sa Diyos at sa sangkatauhan.
Dagdag pa niya, ang tunay na pagbabago ay makikita sa pagsunod sa halimbawa ni Kristo at magiging daan sa pagbubuklod.
“Synodal conversion therefore means allowing ourselves to be drawn into his way of building bridges—with peoples, cultures, religions, the poor, and our common home,” aniya.
Isasagawa ang ika-12 plenary assembly ng FABC sa Jakarta, Indonesia, kung saan magtitipon ang mga obispo mula sa iba’t ibang bansa sa Asya.
