387 total views
Mariing tinutulan ng Catholic Bishops’ Conference of the Philippines Permanent Committee on Public Affairs ang planong pagbubuwis sa 13th month pay ng mga manggagawa.
Ayon kay Lipa, Batangas Archbishop Ramon Arguelles, chairman ng komisyon,isang paglapastangan ang hakbang ng pamahalaan na patawan ng buwis ang pa-bonus ng mga employer sa kanilang mga manggagawa.
Iginiit pa ni Archbishop Arguelles na dapat buwisan ng Bureau of Internal Revenue ang mga mayayamang kumpanya na patagong hindi nakapagbabayad ng buwis at huwag ang mga manggagawang kakarampot ang sinasahod.
“Dapat i – tax nila yung mga mayayaman. Bakit nakakalusot yung mga mayayaman sa pagbabayad ng buwis? Huwag naman sanang tapakan yung mga karaniwang tao. Yung atin ngang panawagan na sana i – tax nila yung mga mayayaman, yung mga tinatawag nilang progreso huwag naman sanang bawasan yung suweldo nung talagang hirap na,”pahayag ni Archbishop Arguelles sa panayam ng Veritas Patrol.
Samantala, gusto ring i-repeal ng Department of Finance ang Tax Code na nagbibigay ng tax exemption sa 13th-month pay, Christmas bonus, productivity incentives at iba pang benepisyo na aabot sa P82,000 kada taon.
Nabatid batay sa inilabas na pag – aaral ng ASEAN o Association of Southeast Asian Nation na ikalawa ang Pilipinas sa pinakamalaki ang sinisingil na personal at corporate income tax sa buong bansa sa Asya dahil sa out – dated o halos 19 na taon na nitong lumang sistema ng pagbubuwis.
Nauna na ring sinabi ni Pope Francis na mas mainam na patungan ng buwis ang mga Simbahan o mga religious order na hindi tumutulong o walang programa para sa mga mahihirap.
