27,676 total reads
Tuluran ang Banal na Pamilya upang higit na mapatibay ang pananampalataya at pamilyang kinabibilangan.
Ito ang panawagan ni Bishop Ayuban sa misang pinangunahan sa pagdaraos ng 73rd Parish Feast ng Holy Family Parish sa Roxas District – Quezon City.
Ayon sa Obispo, kasabay ng pagbati sa mga parokyano, at bumubuo ng parokya ay mahalagang mapatibay ang pananampalataya at pagiging ehemplo sa buhay ng nina Hesus, Maria at San Jose.
“Ganoon din tayo bilang mga pamilya. Mayroon tayong mga pinagdaraanang pagtitiis at mga pagsubok, at naging huwaran natin ang pagtitiwala ni San Jose sa Panginoon, ang katatagan ng loob ng ating Mahal na Ina, na sa kabila ng kawalan ng kasiguraduhan ay nagtungo sila sa malayong lugar, at ang presensya ni Jesus na nangako sa atin na Siya ay isang Panginoon na kasama natin sa ating kahinaan, sa ating mga pagtitiis, at mga paghihirap.” ayon sa panayam ng Radyo Veritas kay Bishop Ayuban.
Inalala din ng Obispo ang kalagayan ng refugees sa naging sitwasyon ng Banal na Pamilya.
Inihayag ni Bishop Ayuban na nababalot ang mundo ngayon ng mga suliranin ng digmaan at hindi pagkakaintindihan kung kaya’t kinakailangan ang pagtutulungan upang makalinga ang mga refugee.
“Tayo ay naghahanap ng mas greener pasture. Kaya sa ating pagtanggap ng isang taong hindi natin kakilala, sa mga taong para sa atin ay mga dayuhan, tinatanggap din natin ang Panginoon. Because Christ was also a refugee Himself, the Holy Family is a refugee. Kaya tayo rin sa mundong ito ay mga refugee, dahil dito ay hindi ang tunay nating tahanan. Balang araw, tayo rin ay pupunta sa ating tunay na tahanan.” pahayag ni Bishop Ayuban sa Radyo Veritas
Pinangunahan din ng Obispo ang prusisyon para sa kapistahan ng Parokya.
