24,709 total views
Ipinakita ni Brice Ericson Hernandez, dating assistant district engineer sa Bulacan, ang mga larawan bilang ebidensya na magpapatunay ng ugnayan ng dalawang senador at ng dating DPWH district engineer na si Henry Alcantara, na tinanggal sa puwesto, kaugnay ng kickback sa flood control projects sa Bulacan.
Sinabi ni Hernandez, na nasa kustodiya ng Senado matapos ma-cite in contempt, na sina Senators Jinggoy Estrada at Joel Villanueva ay sinasabing nakinabang sa P955 milyon mula sa mga proyekto sa pamamagitan ng 30 porsyentong “SOP” o standard operating procedure.
Ipinakita rin ni Hernandez ang litrato ni Estrada kasama si Alcantara sa kaarawan ni Estrada sa Solaire Resort Hotel bilang patunay ng kanilang malapit na ugnayan.
“To be honest, Your Honor, I do not know when this picture was taken but I’m just trying to show that Mr. Alcantara, Engineer Henry Alcantara and Sen. Jinggoy Estrada have met a couple of times already,”ayon kay Hernandez. “They appear super close, Your Honor.”
Ipinakita rin ni Hernandez ang mga larawan ng bungkos ng pera na inihanda para ipamahagi.
“Your Honor, hindi ko alam kung sino. Basta kami inutusan nilang ayusin ang mga pera. Itong amount na ito para sa ganito, ‘ihanda mo dyan, may pagbibigyan niyan.’ Ganoon lang, sine-segregate namin ang mga pera.”
“As far as my knowledge is concerned, ibibigay po ‘yan sa tao. ‘Yung tinatawag na proponent na kausap niya.”
Nilinaw niya na ang mga larawan ng pera ay kuha sa isang pribadong tirahan na ginawang pahingahan, at hindi sa opisina.
Ipinakita rin niya ang mga screenshot ng Viber conversation na nag-uugnay kay Villanueva sa mga proyekto. Kinumpirma ni Engineer JP Mendoza ang mga larawan.
“Yes, Your Honor, this is Sen. Joel Villanueva.”
Pinaliwanag ni Mendoza kung bakit kinuhanan ng larawan ang chat:
“Dahil disappearing message po ‘yan, hindi po niya pwedeng screenshot, pina-picture-an po niya para mabasa po.”
Idinagdag ni Mendoza na binanggit din sa mensahe ang dating DPWH Secretary Manuel Bonoan at ipinadala kay Alcantara.
