26,411 total reads
Nakiusap sa House Infrastracture Committee ang sinibak na DPWH engineer na si Brice Ericson Hernandez na huwag na siyang ibalik sa Senado, matapos niyang ihayag na may mga senador na sangkot sa maanomalyang flood control projects.
“Pwede ho bang ‘wag niyo na po ako ibalik sa Senate, Your Honor, kasi may mga involved pong senador dito at hindi ko po alam ang magiging kapalaran ko kung ibalik niyo ako doon,” pakiusap ni Hernandez sa InfraComm.
Si Hernandez na una nang idineklara ng Senate Blue Ribbon Committee na guilty of contempt.
Sa kanyang testimonya, sinabi ni Hernandez na ang kanyang dating boss na si Henry Alcantara, dating district engineer ng DPWH Bulacan First District na sinibak din sa puwesto, ang nag-utos ng mga “boxed cash withdrawals” na konektado sa ghost at substandard projects.
Nang tanungin kung si Alcantara lamang ang tumanggap ng pondo, inamin ni Hernandez na hindi niya kayang pangalanan ang iba dahil sa takot sa kanyang buhay at pamilya.
“Siyempre natatakot din po ako sa buhay ko at sa pamilya ko kasi hindi naman po birong tao ‘yung mga taong involved dito,” dagdag pa ng dating opisyal ng DPWH.
Sa gitna ng pagdinig, binanggit ni Hernandez sina Senators Jinggoy Estrada at Joel Villanueva sa sinasabing anomalya sa flood control projects.
Ayon kay Hernandez, tumanggap ng 30 percent SOP si Villanueva sa ilang flood control projects sa Balagtas at Bocaue Bulacan sa taong 2023 na nagkakahalaga ng P600 M, at 30 percent din si Estrada sa P355 M projects sa Hagonoy at Malolos Bulacan.
Ang Infra Comm—binubuo ng Committees on Public Accounts, Public Works and Highways, at Good Government and Public Accountability—ay nagsasagawa ng imbestigasyon hinggil sa mga ghost at substandard flood control projects na kinasasangkutan ng DPWH 1st District Engineering Office at mga contractor gaya ng SYMS Construction Trading, St. Timothy Construction, at Wawao Builders.
Dumalo rin sa joint panel ng Kamara si dating DPWH Engineer Alcantara, Pacifico Discaya ng Timothy Construction, at Pasig City Mayor Vico Sotto.
