6,115 total views
Isinusulong ng Catholic Educational Association of the Philippines o CEAP ang mas pinaigting na pagtuturo sa mga kabataan ng values formations subjects upang maging kaugalian ang mas maayos na pakikipagkapwa, paggalang sa batas at mabuting asal sa mga kabataan.
Ayon kay CEAP Vice-president Father Wilmer Tria, ito ay matapos ang magkakasunod na insidente ng karahasan sa mga paaralan na biktima ang mga inosenteng estudyante, guro at kawani ng mga paaralan.
Ayon sa Pari, nananatili ang paninindigan ng CEAP na huwag tanggalin sa General Education Curriculum ang pagtuturo ng mga subject sa values education o formation.
Naniniwala ang Pari na mababawasan o tuluyang maiwaksi ang mga insidente ng karahasan sa mga paaralan kapag napaigting ang character formation sa mga mag-aaral.
“So kami ay talagang nag-worry na nangyayari ito. So kami nagpalabas kaagad ng statement. Kailangan palakasin natin ang education, especially yung values education, yung virtue, yung formation. Gusto nga tanggalin sa general education. Ayaw na ayaw natin maalis ang ethics sa ating mga curriculum dahil ito ang kailangan ng mga tao, yung character formation. Kaya ito po yung paninindigan namin na kailangan na bantayan ang mga kabataan at sa pagbabantay, mabigyan natin ng mga tamang lessons para sa kanila. Para sila po ay maging ganap na mga tao. Hindi lang may skills sa technology, kundi talagang merong mga lessons coming from the heart and for the heart,” ayon sa panayam ng Radyo Veritas kay Fr.Tria.
Hinikayat din ni Fr.Tria ang pamahalaan, mga magulang at legal guardians na paigtingin din ang monitoring sa social media at digital flatforms activities ng mga kabataan upang mapigilan sa masamang epekto nito sa moral foundations ng mga estudyante.
Nanawagan din ang Pari sa pamahalaan na magpatupad ng mga polisiyang higpitan ang access ng mga kabataan sa social media platforms.
“Actually talaga, kahit sa ibang bansa, may mga bata na hindi muna in-expose dito sa social media. Kasi sa social media, lalo na ng mga games na ‘yan, wala nang boundaries, walang fences, walang nagbabantay, So accessible sa lahat. Kaya dapat yung mga magulang ay may malaking part dito sa pagbabantay at paghuhubog ng mga kabataan. Kasi hindi sila pwedeng ma-expose kahit sa mga materials na hindi bagay sa kanila,” bahagi pa ng panayam ng Radyo Veritas kay Father Tria.
