563 total views
Umapela si Dipolog Bishop Severo Caermare, chairman ng Catholic Bishops’ Conference of the Philippines (CBCP) Commission on the Laity, na pairalin ang katotohanan, pananagutan at tapat na paglilingkod sa gitna ng patuloy na panawagan laban sa katiwalian sa pamahalaan.
Sa pagdiriwang ng banal na misa sa Dipolog Cathedral noong June 28 bilang pakikiisa sa White Ribbon March, iginiit ng obispo na ang paninindigan ng Simbahan ay nakabatay sa Ebanghelyo at hindi sa pulitika.
“Now, as Christians, we do not begin with political slogans. We begin with the Gospel,” ayon kay Bishop Caermare.
Binigyang-diin ng obispo na ang tunay na pagbabago sa lipunan ay nagsisimula sa paghahari ni Kristo sa puso ng bawat tao, na nagbubunga ng katapatan, pananagutan, at paglilingkod sa kapwa.
“Kung si Kristo mao gayud ang una sa kasingkasing sa tawo, ang kamatuoran dili mahimong ibaligya. Kung si Kristo ang una sa kasingkasing sa tawo, ang tulubagon dili mahimong likayan,” ani ng obispo.
Paalala rin ni Bishop Caermare na ang anumang posisyon sa pamahalaan ay isang sagradong pananagutan at hindi dapat gamitin para sa pansariling kapakinabangan.
“Ug ang katungdanan sa gobyerno dili mahimong himuon alang lamang sa kaugalingong interes, kondili isip usa ka sagrado nga tahas nga gitugyan,” saad ng obispo.
Ayon kay Bishop Caermare, ang ugat ng katiwalian ay hindi lamang nakikita sa mga paglabag sa batas kundi pati sa paglayo ng tao sa Diyos.
“When Christ becomes first in our hearts, corruption is not merely a political or legal problem. Corruption is a spiritual problem,” giit ng obispo.
Paliwanag ng obispo na nagsisimula ang korapsyon kapag ang pansariling interes ang inuuna kaysa sa paglilingkod at ang kapangyarihan ay mas pinahahalagahan kaysa sa konsensya.
Kasabay nito, hinimok ng obispo ang bawat Kristiyano na ang katapatan sa pamumuno at pagbabago ng lipunan ay hindi lamang panawagan para sa mga nasa kapangyarihan kundi isang panawagang dapat magsimula sa sariling pagbabagong-loob.
“Authentic reform begins with converted hearts. Ug dili lang kita manawagan niini ngadto sa mga naa sa posisyon. Una natong tan-awon ang atong kaugalingon,” ayon pa kay Bishop Caermare.
Sinabi ng obispo na ang kultura ng korapsyon ay isang suliraning dapat harapin ng buong lipunan.
Iginiit ng obispo na ang tunay na pagbabago ng bansa ay nagsisimula sa maliliit ngunit tapat na gawain ng bawat mamamayan.
Binigyang-diin pa ni Bishop Caermare na mababago lamang ang lipunan kung pipiliin ng mamamayan ang paglilingkod kaysa kapangyarihan at ang katotohanan kaysa sa pansariling kaginhawahan.
Nakiisa ang Diocese of Dipolog sa White Ribbon March bilang pakikiisa sa panawagan ng Simbahan para sa katotohanan, pananagutan, transparency at mabuting pamamahala, kasabay ng paghihikayat sa mga mananampalataya na maging saksi ng Ebanghelyo sa pamamagitan ng matuwid at tapat na pamumuhay
