27,301 total reads
Nanindigan ang Simbahan sa pagtanggol ng moral na prinsipyo, katarungan, at kapakanan ng mga walang boses sa lipunan kasunod ng paghahain ng ikatlong impeachment complaint laban kay Vice President Sara Duterte.
Ayon kay Rev. Fr. Joel Saballa, Deputy Executive Director ng Caritas Novaliches, ang hakbang ng Simbahan ay hindi pakikialam sa pamamahala ng gobyerno kundi isang panawagan para sa pananagutan at integridad sa paggamit ng pondo ng bayan.
“Ang Simbahan ay hindi naghahangad po na makialam sa pamamahala ng gobyerno, kundi yung pagtatanggol ng prinsipyo po ng moral at kapakanan po ng mga voiceless ng ating lipunan. Ang pagluhog po namin ay hindi politikal, kundi pag-alaala doon sa supposed to be na gagamitin para sa mga bata; ginamit nila sa ano—sa mga kabalbalan. Do’n po tayo—yung prinsipyo po ng pagkapantay-pantay ng hustisya,” pahayag ni Fr. Saballa sa Radyo Veritas.
Nilinaw ng Pari, ang paghahain ng reklamo ay isang panawagan na pairalin ang prinsipyo ng pagkakapantay-pantay ng hustisya, anuman ang katayuan sa lipunan o posisyon sa pamahalaan.
Hinimok din ni Fr. Saballa ang Pangalawang Pangulo na gamitin ang pagkakataong ibinibigay ng Saligang Batas upang harapin ang mga alegasyon at linawin ang mga isyu sa publiko.
“Sana sa Vice President [Sara Duterte] gamitin mo’ng pagkakataon na ito, oportunidad na ibinibigay sayo ng konstitusyon legally. At sana gamitin mo ito upang ipaliwanag mo [ang mga alegasyon ng katiwalian] gamitin pagkakakaton [upang] linawin mo sa mga tao na yung mga akusasyon sa iyo ay mga walang basehan,” aniya.
Binigyang-diin ng Caritas Novaliches na ang paninindigang ito ng Simbahan ay nakaugat sa misyon nitong ipagtanggol ang dignidad ng tao, isulong ang katotohanan, at panatilihing buhay ang diwa ng pananagutan sa lipunan.
