35,744 total views
Binigyang diin ni dating Catholic Bishops’ Conference of the Philippines President, Kalookan Bishop Pablo Virgilio Cardinal David na ang usapin ng soberenya sa nagpapatuloy na tensyon sa West Philippine Sea ay hindi lamang usaping pampulitika kundi isang malalim na usaping moral at pastoral.
Sa ibinahaging mensahe ng Obispo sa pamamagitan ng kanyang official Facebook page na pinamagatang “David and Goliath” ay muling nagpahayag ng paninindigan si Cardinal David para sa katotohanan at dignidad ng bayan.
Pagbabahagi ng Cardinal, sa kabila ng kanyang misyon sa iba’t ibang bansa sa mga nakalipas na linggo mula Rome, Belguim at Jakarta, Indonesia at patuloy niyang sinusubaybayan ang mga pangyayari kaugnay ng sitwasyon sa West Philippine Sea.
“While abroad the past two weeks—Rome, Belgium, and Jakarta—I continued to follow the news on the West Philippine Sea,” Ayon kay Cardinal David.
Partikular na pinasalamatan ni Cardinal David ang paninindigan ni Lingayen-Dagupan Archbishop Socrates Villegas sa pagkilala kay Commodore Jay Tarriela sa pamamagitan ng makapangyarihang liham nito na nagbibigay pugay sa tapang at determinasyon ng opisyal na ipagtanggol ang karagatang saklaw ng bansa.
“I wish to affirm and thank Archbishop Socrates B. Villegas for his powerful letter commending Commodore Jay Tarriela for his principled and courageous defense of our maritime zones,” Dagdag pa ni Cardinal David.
Binigyang-diin ng Cardinal na ang usapin ng soberenya ay higit pa sa usaping diplomasya at pampulitika sapagkat direktang nakataya at apektado nito ang kabuhayan at kaligtasan ng mamamayang Pilipino, lalo na ng mga mangingisda sa pinag-aagawang teritoryo sa West Philippine Sea.
“This is not only a political issue—it is profoundly moral and pastoral, because the livelihood and safety of our people, especially our fisherfolk, are at stake,” Ayon pa kay Cardinal David.
Pinuri rin ni Cardinal David ang paninindigan ng 15 senador na lumagda sa isang resolusyon ng Senado bilang pagtutol sa patuloy na pananakot at pagpupumilit ng China na angkinin ang karagatang saklaw ng Pilipinas.
“I also commend the 15 Senators who signed a Senate Resolution expressing our nation’s protest against China’s continuing acts of coercion and harassment in our waters,” wika niya.
Samantala, nanawagan rin si Cardinal David para sa pakikibahagi at aktibong partisipasyon ng bayan upang ipaglaban ang soberanya hindi sa pamamagitan ng dahas, kundi sa pagsusulong ng katotohanan, tapang, at malasakit lalo na sa pinakamahinang sektor ng lipunan, alinsunod sa panawagan ng Simbahan na maging tinig ng mga walang boses at maging tagapagtanggol ng buhay at dangal ng sambayanan.
