315 total views
Mga Kapanalig, ang katatapos na eleksyon ay hudyat ng pagsisimula ng pagtatapos ng termino ni Pangulong Duterte. Ngunit hindi ibig sabihin nitong ibabaon na natin sa limot ang mga naging paglabag sa karapatang pantao sa ilalim ng kanyang administrasyon, lalo na sa pagpapatupad nito ng giyera kontra droga o war on drugs.
Sa isang campaign rally noong nakaraang linggo, nagbiro si Pangulong Duterte na kung siya ay mamamatay na, huwag raw matakot ang mga sumusuporta sa kanya kay Satanas. Si Satanas daw ang dapat na matakot sa kanya. Aniya, kung mayroon mang eleksyon sa impyerno, sigurado raw na siya ang mananalo. Hindi ito ang unang beses na ipinagmayabang ng pangulo ang mga kasalanan ng kanyang administrasyon.
Sa simula pa lang ng kanyang administrasyon noong 2016, inihalintulad niya ang kanyang sarili kay Hitler. Magiging masaya raw siyang pumatay ng tatlong milyong tao na gumagamit ng iligal na droga katulad ng pagpatay na ginawa ni Hitler sa mga Hudyo noong Holocaust. Matatapos ang kanyang termino na may higit 6,000 katao na ang napatay (o maaaring pinatay) ng mga awtoridad sa kanilang mga anti-drug operations. Hindi pa kasama rito ang mga biktima ng mga hindi nakikilalang suspek, na ang ilan ay hinihinalang state agents. Nakalulungkot na kakaunti lamang sa mga kasong ito ang naimbestigahan, at mas kakaunti pa ang mga kasong napanagot ang mga maysala. Isa ang kaso ng pagpatay sa 17-taong gulang na si Kian delos Santos sa nabigyan ng hustisya. Mayroong katulad ng mga biktimang isinalalim muli sa autopsy na napatay sa gitna ng kampanya laban sa droga ngunit idineklarang namatay sa ibang kadahilanan.
Kailangang papanagutin ng bagong pangulo ang mga nasa likod ng mga pagpatay na ito. Kagaya ng mga biktima ng Batas Militar noong panahon ni Pangulong Marcos, hindi natin dapat kalimutan ang mga kalupitan at pagmamalabis sa kampanya laban sa iligal na droga ng administrasyong Duterte.
Ano kaya ang gagawin ng bagong pangulo sa mga pagpatay na ito?
Bilang mga Pilipino at Katolikong nagpapahalaga sa buhay, maaari nating isulong ang ilan sa mga rekomendasyon ng Human Rights Watch, isang organisasyong nagsusulong ng karapatang pantao. Ilan sa mga mungkahi nila ay ang pagtigil sa hindi makatarungang pagpatay sa mga pinaghihinalaang gumagamit at nagbebenta ng iligal na droga, pag-iimbestiga at pagpapanagot sa mga pulis na nasa likod ng mga patayan, at pagbuo ng isang multisectoral council upang bantayan ang imbestigasyon at tiyaking magiging bukás at transparent ang pamahalaan. Isa pang rekomendasyon ay ang pagbawi ng ating pag-alis sa International Criminal Court (o ICC), ang pandaigdigang korteng naglilitis sa mga kasong katulad ng genocide, crimes against humanity, war crimes, at crime of aggression. Ang mga patayan sa ilalim ng kampanya laban sa droga ay maituturing na crimes against humanity.
Kagaya ng hindi paglimot sa malagim na sinapit ng bansa sa ilalim ng Batas Militar noong panahon ni Pangulong Marcos, hindi rin dapat kalimutan ang mga pinatay sa ilalim ng war on drugs. Isa sa mga prinsipyo ng panlipunang turo ng Simbahan ang pagpapahalaga sa dignidad ng bawat tao dahil gaya ng sinabi ng Diyos sa Genesis 1:26, tayo ay nilikhang kawangis Niya. Ang dignidad na ito ay hindi nawawala sa isang tao kahit na gumagamit at nagbebenta siya ng iligal na droga. Hindi nawawala o nababawasan ang kanyang dignidad kahit pa may nagawa siyang pagkakamali. Lahat ay may dignidad na dapat nating itaguyod at protektahan sa lahat ng pagkakataon.
Mga Kapanalig, sa pagsisimula ng bagong administrasyon, magsisimula rin ang bagong hamon sa ating lahat na papanagutin ang mga nasa likod ng mga pagpatay. Pakinggan sana ng ating mga bagong lider ang mga pamilyang naulila at sumisigaw ng hustisya.