70,918 total views
Naniniwala si Sen. Erwin Tulfo na hindi malaking kawalan sa pondo ng pamahalan kung babawasan ng dalawang porsiyento ang umiiral na 12 percent value added tax.
Sa panayam sa programang Veritas Pilipinas, sinabi ni Tulfo na marami pang binabayarang buwis ang publiko kaya’t malaking tulong sa karaniwang mamamayan kung mababawasan man nang kaunti ang VAT.
Giit pa ni Tulfo, bagama’t sinasabing aabot sa P330 B kada taon ang mawawalang kita ng gobyerno ay maari pa rin itong mabawi sa pamamagitan ng efficient tax collection.
“Siguro po, ‘yung efficient lang po na tax collection, tax efficient ‘yun po ang kailangan natin. Hindi na kailangan yung kung ano-ano pa…nandiyan din po ang Bureau of Customs. Siguro kung episyente lang po ang yung pagkokolekta ng buwis, I believe maabot po natin ang target,” ayon kay Tulfo.
Dagdag pa ng mambabatas, kasalukuyan ding dinidinig sa Senado ang usapin ng Letter of Authority (LOA) na iniisyu sa bawat negosyo at kumpanya na hinihinalang naabuso at napupunta lamang sa katiwalian.
Una na ring nagsumite si Sen. Tulfo ng senate bill 1552 o VAT Reduction Act of 2025 na layunin bawasan ang VAT mula sa dating 12 percent patungong 10 percent.
Ayon sa mambabatas, malaking tulong ang pagbabawas VAT lalo na sa mga pamilyang mababa at may katamtaman lamang na kita.
Nagsumite rin ng kahalintulad ng panukala si Batangas Rep. Leandro Leviste sa Kamara o ang House Bill 4302 o VAT Reduction Act of 2025.
Sinabi ni Leviste, sakaling maaprubahan bilang batas, aabot sa P7,000 ang matitipid na kita ng mga karaniwang mamamayan kada taon.
