227 total views
Pagboto o paghalal ng mga lider na magmumula sa konsensya ng bawat botante ang tanging makapagpapabago sa sinasabing “political businesses” sa Pilipinas.
Ito ang paalala at binigyang diin ni Bangued, Abra Bishop Leopoldo Jaucian – Chairman ng CBCP-Episcopal Commission on the Youth kaugnay sa 2016 national at local elections sa darating na ika-9 ng Mayo.
Ipinaliwanag ni Bishop Jaucian na makakaboto lamang ng tama ang mga botante kung hindi maiimpluwensyahan ng pera, takot at dahas.
“Sa pamamagitan ng pagboto ng tama na hindi nasisilaw sa pera o kaya sa takot o kaya sa baril, One Good Vote na galing sa konsensya ng mga botante, ay magpapabago ng ating lipunan, ng ating political system na tila naging negosyo na…” pahayag ni Bishop Jaucian sa panayam ng Radio Veritas
Patuloy namang pinaigting at pinalawak ng Archdiocese of Manila, Radio Veritas at iba’t-ibang religious at lay organization ang kampanyang “Huwag Kang Magnakaw” na batay sa Ika-Pitong Utos ng Panginoon, kung saan maituturing na pagnanakaw sa dangal at kalayaan ng bayan ang pagbebenta ng boto sa mga makasariling kandidato.
Upang maiwasan ang vote buying at vote selling, hindi pinahihintulutan ang mahigit sa 100-thousand pesos na withdral kada araw at pag-transport ng higit sa 500-thousand pesos sa loob ng anim na araw bago ang mismong araw ng Halalan sa pamamagitan ng Commission on Election – Resolution Number 9688.
