14,208 total views
Nanawagan ang isang opisyal ng Catholic Bishops Conference of the Philippines (CBCP) na walang dapat ikalungkot ang mga naniniwalang si Cardinal Luis Antonio Tagle ang dapat na maging Santo Papa sapagkat ang Poong Maykapal ang tunay na naghirang ng kanyang bagong kinatawan.
Ito ang pahayag ni Rev. Fr. Jerome Secillano, executive secretary ng CBCP-Episcopal Commission on Public Affairs, kasunod ng pagpapahayag ng kalungkutan ng ilan sa hindi pagiging Santo Papa ni Cardinal Tagle sa katatapos lamang na Papal Conclave.
Ayon sa Pari, nararapat lamang na ikagalak ang pagkakahirang kay Cardinal Robert Prevost, O.S.A. bilang bagong punong pastol ng Simbahang Katolika na siyang mangunguna sa pagsusulong sa misyon ng Simbahan sa buong daigdig.
“Hindi dapat ma-disappoint ang mga naniniwalang si Cardinal Tagle ang dapat maging santo papa. Ang pagkahirang kay Cardinal Prevost bilang santo papa ay dapat ikagalak ng mga mananampalataya dahil mayroon ng pinuno ang Simbahang Katolika na mangunguna sa pagsusulong ng misyon nito sa buong mundo.” Bahagi ng pahayag ni Fr. Secillano sa Radyo Veritas.
Pagbabahagi ni Fr. Secillano, dapat na maunawaan ng bawat isa na hindi tuwinang namamayani ang kagustuhan ng taumbayan sapagkat mas kinakailangang tugunan at iprayoridad ang tunay na pangangailangan ng Simbahan at ng lipunan.
Paliwanag pa ng Pari, ang pagkakahirang ng Cardinal Electors kay Cardinal Prevost ay walang kaugnayan sa usaping politika sa halip ay bunga o resulta ng kanilang sama-samang pananalangin at pagninilay sa loob ng mga nakalipas na araw.
Giit ni Fr. Secillano, marapat lamang na manalangin at pasalamatan ng lahat ang Panginoon sa kanyang paggabay sa mga Cardinal Electors na naghirang sa napili ng Diyos na maglingkod at magsilbing pastol ng kanyang kawan.
“May mga pagkakataong hindi ang gusto ng taumbayan ang namamayani kungdi ang pangangailangan ng simbahan ang dapat tugunan. Ang desisyon ng mga Kardinal na hirangin si Cardinal Prevost bilang santo papa ay hindi bahagi ng politika o kapritso lamang ng mga bumoto sa kanya. Ito ay resulta ng sama-samang nilang pagninilay at pananalangin. Marapat lamang na tayong lahat ay magkaisa sa pagpapasalamat sa Poong Maykapal sa pagbibigay niya ng kanyang kinatawan sa katauhan ni Papa Leon XIV.” Dagdag pa ni Fr. Secillano.
Umaasa rin ang Pari na ipanalangin ng bawat isa si Cardinal Prevost sa kanyang kahaharaping misyon bilang ika-267 Santo Papa na napiling gamitin ang Papal Name na ‘Pope Leo XIV’ sa kanyang pagsisilbing punong pastol ng mahigit sa 1.4 na bilyong Katoliko sa buong mundo.
Sa tala ang Pilipinas ay isa sa mga dalawang bansa sa Asya na mayroong malaking bilang ng populasyon na nagpapahayag ng pananampalatayang Katoliko at pangatlo naman sa may pinakamalaking populasyon ng Katoliko sa daigdig kasunod ng Brazil at Mexico.
