437 total views
Idineklara ng House Committee on Justice na ‘sufficient in substance’ ang dalawang impeachment complaint na isinampa laban kay Vice President Sara Duterte.
Sa parehong botong 54 pabor, isang pagtutol at walang abstention; ay pinagtibay ng komite ang dalawa sa nalalabing reklamo o ang 3rd at 4th complaint na inihain nina Fr. Joel Saballa et al at Atty. Nathaniel Cabrera bilang ‘sufficient in substance’ na una na ring idineklarang ‘sufficient in form’ noong Lunes.
Ang pagtalakay ay pinangunahan ni Justice Committee Chairperson, Batangas Rep. Gerville Luistro.
Si QC Rep. Jesus ‘Bong’ Suntay ang tanging kongresista na hindi pumabor sa impeachment case.
Binigyan naman ng komite ng 10 araw si VP Duterte, para sagutin ang impeachment complaint na isinampa laban sa kaniya.
“In view of the finding of the sufficiency in substance of the two impeachment complaints, I move to issue notice to the Vice President, to the respondent in the impeachment complaints, to file her answer to the impeachment complaints within the non-extendible period of 10 calendar days from receipt of this notice,” ayon naman kay Justice Committee vice chairperson at San Juan Rep. Ysabel Maria Zamora.
Ang mosyon ay inaprubahan naman ni Luistro, makaraan ang pagsang-ayon at walang pagtutol ng mga miyembro ng panel.
Susunod namang hakbang ang pgsusuri ng komite kaugnay sa mga isinumiteng ebidensya at ang pagtalakay kung sapat ba itong basehan o ‘probable cause’ upang ipagpatuloy ang impeachment laban sa Bise Presidente.
Matapos ito ay uusad ang reklamo sa plenaryo ang inaprubahang Articles of Impeachment at sakaling pagtibayin ng one-third votes ng mga miyembro ng Kamara ay isusumite naman ang kaso sa Senado na tatayo bilang Impeacment court para sa paglilitis.
