57,781 total reads
Pormal nang nilagdaan ni Pangulong Ferdinand Marcos Jr. ang PHP6.793 trillion National budget para sa taong 2026.
Ginanap ang paglagda sa General Appropriations Act (GAA) para sa fiscal year 2026 sa Ceremonial Hall ng Malacañang.
Kabilang sa mga dumalo sina Senate President Vicente Sotto III, House Speaker Faustino Dy III, Executive Secretary Ralph Recto at ilang miyembro ng Senado at Kamara.
Pinakamalaking pinaglaanan ng pondo ng bansa ang sektor ng edukasyon na nagkakahalga ng P1.34 T; sinundan ng health sector, na may P448-billion, agrikultura sa P297-billion, at social services na nagkakahalaga ng P270-billion.
Ang nilagdaang pambansang budget ay bunga rin ng kauna-unahang ‘open’ bicameral conference meeting ng Kongreso, na tumalakay sa mga probisyong hindi pinagkakasunduan ng dalawang kapulungan.
Kaugnay nito, sinabi ni Pangulong Ferdinand Marcos Jr. na bineto niya ang P92.5 bilyon, o 38 porsiyento, ng kabuuang P243.4 bilyon na unprogrammed appropriations sa 2026 national budget.
“We acknowledge the support of Congress in limiting the unprogrammed appropriations to essential needs. However, I push further and reduce it to the absolute bare minimum. This shall be at the level lowest since 2019,” ayon sa Pangulo.
Ayon sa Pangulo, “Lastly, to ensure that public funds are expended in clear service of national interest, I vetoed several items of appropriations with their purposes and corresponding special provisions under the UA, totaling almost P92.5 billion.”
Dahil dito, umabot na lamang sa P150.9 bilyon ang unprogrammed appropriations ngayong taon, mas mababa kumpara sa P531.67 bilyon noong nakaraang taon.
Ayon sa Pangulo, ito na ang pinakamababang halaga ng unprogrammed appropriations mula pa noong 2019.
Binigyang-diin ni Marcos na ang unprogrammed appropriations ay hindi maaaring ituring na tsekeng walang limitasyon at hindi papayagan ang maling paggamit nito o ang pagtrato rito bilang alternatibong daan para sa discretionary spending.
Samantala, iginiit ng mga bantay-budget at watchdog groups na ang unprogrammed appropriations ay maituturing na anino ng pork barrel, dahil hindi ito saklaw ng regular budget at maaaring mailabas na may limitadong pananagutan.
