2,642 total reads
Nanindigan ang mga Pari, mambabatas at dating opisyal ng pamahalaan na patuloy na alalahanin ang mga aral na itinuro ng makasaysayang EDSA People Power Revolution.
Ito ay sa isinagawang special episode ng programang Veritasan ni Father Jerome Secillano sa paggunita ng ika-37 taong anibersaryo ng kauna-unahang EDSA People Power na tinaguriang ‘Bloodless Revolution’.
Ayon kay Father Danilo Pilario – Dean ng St.Vincent School of Theology, mahalaga ang naging papel ng simbahang katolika higit na sa pangunguna sa mga pagkilos upang maalis sa pwesto ang diktaduryang pamumuno ni dating Pangulong Ferdinand Marcos Sr.
“37-taon na ang nakakaraan marami sa atin ay nakatayo na sa lugar na ito bago pa man nila ginawa ang simbahang ito banal na ang lupang kaniyang kinatatayuan, dito natin pinigil ang mga tangke na kanilang ipinadala upang lipulin ang kanilang bayan, wala tayong sandata noon, ang dala-dala natin ay ang mga krusipiyo, mga rebulto ni Maria, Santo Niño,” ayon sa pahayag sa Veritas ni Father Pilario
Binigyang diin naman ni Proffessor Edmundo Garcia – Framer Commissioner ng 1987 Constitutional Commission, sa mga kinakaharap na problema ng Pilipinas sa kasalukuyan ay nararapat balikan ang mga nakapaloob sa 1987 Constitution.
Ito ay upang maisulong muli ang pagkakaisa ng mga Pilipino na mabago ang mga sistema sa Pilipinas na hindi nakakatulong sa mga mamamayan.
“People wanted a constitution that was free from politacal patronage and it’s very important to remember that because ngayon again, they want to change the constitution but it is very important to remember that we have so many provision in the constitution that have not been truly implemented, political dynasty is one of them,” ayon naman sa pahayag ni Garcia sa programa.
Ginamit naman ni Rep.Edcel Lagman SR, ang pagkakataon upang iparating ang pagtutol sa pagsusulong ng Charter Change.
“Itong Charter Change ay hindi naman mabibigyan ng solusyon ang grand await inflation rate, hindi naman mabibigyang ng solusyon ang ating escalating poverty, hindi mabibigyang solusyon ang kakulangan ng pagkain o lack of food security at hindi naman ito solusyon upang maiwasan natin o mabigyan natin ng lunas ang posibleng darating na economic problems,” ayon naman sa pahayag ni Lagman sa Veritasan.
Naunang mensahe ni Bishop Reynaldo Evangelista – chairman ng CBCP-Episcopal Commission on Public Affairs nagsisilbing paalala ang EDSA Shrine o ang Archdiocesan Shrine of Mary, The Queen of Peace sa malalim na pananampalataya at matinding pananalangin ng mga Pilipino 37-taon na ang nakakalipas.
Kasabay ito ng panghihimok ng Obispo na ipagpatuloy ang pananalangin sa pamamagitan ng Mahal na Birheng Maria upang patuloy na makamit ang kapayapaan.
