3,820 total reads
Tiniyak ni Fr. Daniel Estacio, superintendent ng Pasig Diocesan Schools System (PaDSS) na nakahandang umagapay ang mga katolikong paaralan para sa mga kabataang nakakaranas ng mental disorder.
Kaugnay ito sa paggunita sa World Teen Mental Wellness Day na layong magbigay ng kamalayan upang higit na pagtuunan ang kalusugang pangkaisipan ng mga kabataan sa bawat tahanan.
Sinabi ni Fr. Estacio, na siya ring pangulo ng Pasig Catholic College na maaaring lapitan ng mga mag-aaral ang kanilang mga guro upang mapagsabihan at mahingan ng payo na makakatulong sa pagpapagaan ng kanilang pinagdaraanan.
“Sa mga kabataang nakakaranas ng mental health disorder lalo na sa mga nag-aaral sa catholic schools, huwag kayong mahihiyang magsabi sa inyong mga guidance counselors, sa inyong mga teachers, and even sa inyong mga parents. May mga ino-offer tayong mga intervention lalo na ang ating catholic schools para matulungan kayo,” pahayag ni Fr. Estacio sa panayam ng Radio Veritas.
Batay sa 2021 Youth Adult Fertility and Sexuality Study ng University of the Philippines Population Institute (UPPI), halos isa sa limang kabataang Filipino na may edad 15 hanggang 24 ang nag-iisip na magpatiwakal.
Nakasaad sa pagsusuri ng UPPI na noong 2013, higit 574-libo o tatlong porsyento ng kabataang Filipino ang sumubok na magpatiwakal, habang tumaas pa ang bilang nito noong 2021 na umabot sa 7.5 porsyento o halos 1.5 milyon.
Nangako naman si Fr. Estacio na patuloy na gagampanan ng mga katolikong paaralan ang tungkuling gabayan ang mga kabataan hindi lamang sa pamamagitan ng karunungan, kundi sa lahat ng aspeto ng buhay.
“Bilang katolikong paaralan, ‘yan po ‘yung ating isa sa mga pangunahing pinagtutuunan ng pansin—the welfare of our students. Kapag sinabing welfare of our students, hindi lang physically, mentally, kundi buo, holistic—spiritual, mental, psychological, physical and emotional,” saad ni Fr. Estacio.
Dalangin naman ng simbahan na nawa’y mabanaagan ng mga kabataan at iba pang nakakaranas ng mental health problem ang pag-asa at kapanatagan ng kalooban sa kabila ng mga pinagdaraanang pagsubok sa buhay.
