18,990 total reads
Ibinahagi ng Prelatura ng Batanes ang pagkakaroon ng Spiritual Bond of Affinity ng Cathedral of the Immaculate Conception ng Basco sa Papal Basilica of St. Mary Major sa Roma.
Ayon kay Cathedral Rector Fr. Ronaldo Manabat pormal na natanggap ng prelatura ang mga kalatas mula sa Papal Liberian Basilica at Apostolic Penitentiary ng Vatican para sa ugnayan ng dalawang simbahan.
“On this day, the Cathedral of the Immaculate Conception, Basco, Batanes, Philippines formally announces that we have received the Decrees from the Papal Liberian Basilica and the Apostolic Penitentiary of the Holy See stating that our Cathedral now has A Special Bond Of Spiritual Affinity To The Papal Basilica Of Santa Maria Maggiore,” ayon kay Fr. Manabat.
Mahigit 300 Marian Shrines sa mundo ang may special bond of spiritual affinity sa Papal Basilica kung saan ang Cathedral ng Batanes ang ika – 19 sa Pilipinas.
Dahil sa ugnayan matatanggap ng mananampalataya ang mga indulhensyang ipinagkakaloob ng Papal Basilica sa tuwing dadalaw sa Cathedral ng Basco Batanes.
Upang matamo ang plenary indulgence kinakailangang sundin ang mga panuntunan ng pagtanggap tulad ng pagdulog sa sakramento ng pagbabalik loob o kumpisal, pagtanggap ng Banal na Komunyon, panalangin sa natatanging intensyon ng santo papa, pag-usal ng Ama Namin at Credo.
Magkakaroon ng plenary indulgence sa kapistahan ng Saint Mary Major tuwing August 5, kapistahan ng Cathedral of the Immaculate Conception sa December 8, sa lahat ng kapistahan ng Mahal na Birheng Maria, at sa tuwing nagtitipon ang mananampalataya para sa debosyon sa Papal Basilica of Saint Mary Major o sa affiliated na dambana.
