9,471 total views
Umaapela si Fr.Erik Adoviso – Minister ng Manila Archdiocesan Ministry for Labor Concern sa pamahalaan na bigyang-pansin ang kalagayan at kapakanan ng mga tourism worker sa bansa.
Iminungkahi ni Fr.Adoviso sa pamahalaan na tiyaking kasama ang mga manggagawa sa sektor ng turismo sa mga inisyatibo na magtataas sa antas ng pamumuhay ng mga manggagawa sa bansa.
Ito ang panawagan ng Pari sa paggunita ngayong araw ng World Tourism Resilience Day upang maalis ang kawalan ng katiyakin sa trabaho at kapakanan ng tourism workers sa Pilipinas.
Tinukoy ng Pari ang pananatiling ‘seasonal’ ng trabaho ng maraming manggagawa sa turismo na hindi kumikita o napakababa lamang ng suweldong natatanggap kung hindi ‘peak season’ ang mga tourist spot sa bansa.
Hinimok ni Father Adoviso ang pamahalaan na isulong ang mga polisiya, batas at programang tutulong na maging regular at tuloy-tuloy ang trabaho ng mga tourism worker.
Tiwala ang Pari na sa pamamagitan nito ay mapapaunlad ang kabuhayan ng mga tourism worker kasabay ng paglago ng ekonomiya ng bansa.
“Meron pa silang trabaho na talagang makakapag-paunlad sa turismo sa Pilipinas in other words I am for the regular jobs doon sa mga turismo workers natin especially doon sa mga guide natin,” ayon sa panayam ng Radio Veritas kay Fr.Adoviso.
Taon-taon ginugunita ng United Nations ang Global Tourism Resilience Day upang kilalanin ang pananatiling matatag ng sektor ng turismo sa kabila ng mga hamon sa ekonomiya, katulad ng naranasang COVID-19 Pandemic na lubhang ikinalugi ng pandaigdigang sektor ng turismo habang noon 2024 ng ideklara ng UN na itatalaga ang 2027 bilang International Year of of Sustainable and Resilient Tourism.
Sa datos ng Philippine Statistics Authority aabot sa 16.4-million ang bilang ng mga manggagawa sa sektor ng turismo sa Pilipinas na parehong matatagpuan sa pormal at impormal na sektor ng paggawa.
