3,060 total views
Hinimok ni Bayombong Bishop Jose Elmer Mangalinao ang sambayanang Filipino na manatiling inspirasyon si Cardinal Luis Antonio Tagle at ipagpatuloy ang panalangin para sa kanyang paglilingkod sa simbahan.
Kasunod ito ng pagdaramdam ng ilang Pilipino sa hindi pagkakahalal kay Cardinal Tagle bilang Santo Papa sa katatapos lamang na Papal Conclave, kung saan si Cardinal Robert Prevost, OSA ang napiling ika-267 Santo Papa sa pangalang Pope Leo XIV.
“To all Filipinos who had their hearts set on Cardinal Luis Antonio Tagle becoming the Pope, let’s acknowledge the pride and hope he brought as a potential leader of the Catholic Church…Let us continue praying for him as he does his best in helping Pope Leo XIV in building a synodal Church,” pahayag ni Bishop Mangalinao sa panayam ng Radyo Veritas.
Kabilang si Cardinal Tagle sa 133 Cardinal Electors na lumahok sa Conclave, kasama sina Catholic Bishops’ Conference of the Philippines president, Kalookan Bishop Pablo Virgilio Cardinal David at Manila Archbishop Jose Cardinal Advincula.
Nauna nang ipinaliwanag ni CBCP-Public Affairs Commission executive secretary, Fr. Jerome Secillano, na ang pagkakahirang kay Cardinal Prevost ay hindi bunga ng politika kundi ng taimtim na pananalangin at pagninilay ng Cardinal Electors, na isinagawa batay sa tunay na pangangailangan ng Simbahan at lipunan, at hindi lamang sa kagustuhan ng taumbayan.
Samantala, nagpaabot din ng pagbati si Bishop Mangalinao kay Papa Leon XIV na magpapastol sa mahigit 1.4 bilyong Katoliko sa buong mundo.
“To Pope Leo XIV, our warmest congratulations on your election as the new leader of the Catholic Church! We welcome your vision and leadership, inspired by your unique blend of North American and Latin American perspectives,” pagbati ni Bishop Mangalinao kay Papa Leon XIV.
Dalangin ng obispo na patuloy na gabayan ng Espiritu Santo ang Santo Papa tungo sa pagkakaisa, kababaang-loob, at paglilingkod–na kanyang binigyang-diin sa unang Urbi Et Orbi message, na siya’y nahalal upang maglingkod, hindi lamang sa Roma, kundi sa buong sangkatuhan.
Hinihiling din ni Bishop Mangalinao ang pagtutok ni Pope Leo XIV sa mga usaping tulad ng pangangalaga sa kalikasan, synodality, at pagtugon sa pangangailangan ng mga dukha, sa pamamagitan ng mga karanasan bilang dating Prefect ng Vatican Dicastery for Bishops, para sa tapat at bukas na pamumuno sa Simbahan.
“With his experience as Prefect of the Dicastery for Bishops, may prioritize transparency and accountability within the Church, ensuring the well-being of all its members. By your word and deed, continue empowering the poor, the vulnerable, and the marginalized, providing them with a stronger voice within the Church,” saad ni Bishop Mangalinao.
