29,360 total views
Nanawagan ng panalangin, pagkakaisa, at pananagutan si Fr. Flavie Villanueva, SVD sa gitna ng mainit na usapin hinggil sa impeachment complaint laban kay Vice President Sara Duterte.
Isang prayer service ang ginanap sa loob ng House of Representatives nitong Hunyo 9, kaugnay na rin sa inaantabayanang impeachment trial laban sa Pangalawang Pangulo, kung saan nagkasundo ang mayorya ng mga senador-bilang impeachment court sa botong 18-5 na ibalik sa Kamara ang reklamo.
Sa kanyang mensahe, inihalintulad ni Fr. Villanueva, SVD ang kasalukuyang kalagayang politikal sa mga pangyayari sa buhay ni Kristo — kung paanong si Hesus ay ipinagkanulo, pinatay, at muling nabuhay. Giit niya, sa panahon ngayon, “namamayani rin ang diablo” sa anyo ng katiwalian, karahasan, at pag-abuso sa kapangyarihan.
Si Fr. Villanueva ay bahagi ng nagsampa ng ikatlong impeachment laban kay VP Duterte, at founder ng St. Arnold Janssen Kalinga Center na nangangalaga sa mga balo at naulila ng mga biktimang pinaslang sa ilalim ng giyera kontra droga ni dating Pangulong Rodrigo Duterte sa ilalim ng Project Paghilom.
“Winasak ang tiwala, binaboy ang dangal ng buhay, pinatay ang mga naghahanapbuhay, at binastos ang Saligang Batas,” ayon kay Fr. Villanueva sa kanyang pagninilay.
Tinuligsa rin ng pari ang mga aniya’y “makabagong Pariseo, Hudas, Herodes, at Pilato” — mga taong nasa poder ngunit ginagamit ang batas para protektahan ang sarili at supilin ang katotohanan.
Gayunpaman, iginiit niya na hindi nawawala ang pag-asa, dahil sa mga makabagong propeta at mabubuting pastol na patuloy na naninindigan para sa katotohanan at katarungan.
“Tayo’y dumudulog sa pananampalataya — dito tayo humuhugot ng lakas, dito natin kinukuha ang pag-asa,” dagdag pa ng pari.
Sa pagtatapos ng kanyang mensahe, hinikayat niya ang mga mananampalataya at mambabatas na huwag hayaang baluktutin ang proseso ng impeachment.
Giit ng pari, ito ay laban hindi lamang para sa batas kundi para sa kinabukasan ng kabataan at ng bayan.(
