22,043 total reads
Naniniwala si Military Ordinariate of the Philippines Chancellor and Spokesman Rev. Fr. Harley Flores na ang pagbagsak ng isang eroplano ng Air India ilang sandali lamang matapos itong mag-takeoff ay isang paalala sa kapahamakang dulot ng aksidente hindi lamang sa himpapawid kundi maging sa mga sibilyan at komunidad.
Ayon sa Pari, ang pagbagsak ng nasabing eroplano sa isang residential area ay isang paalala sa kapahamakang dulot ng mga sakunang panghimpapawid maging sa mga inosenteng sibilyan.
Paliwanag ni Fr. Flores, ang mga sakunang panghimpapawid ay hindi lamang nakapagdudulot ng kapahamakan sa mga pasahero ng eroplano kundi maging sa mga komunidad sa paligid ng paliparan.
“The recent incident of an Indian aircraft crashing into a congested residential area is a sobering reminder that aviation mishaps don’t just affect those in the air, they devastate lives on the ground. Ironically, passengers may survive, but it is the innocent civilians in their homes below who suffer the most.” Bahagi ng pahayag ni Fr. Flores.
Pagbabahagi ng Pari, nawa ay magsilbing aral ang naganap na sakunang panghimpapawid sa India sa pangangasiwa ng Pilipinas sa kaligtasang panghimpapawid sa bansa.
Partikular na pinuna ni Fr. Flores ang sitwasyon sa paligid ng NAIA Terminals 1, 2, and 3 na pawang napapaligiran rin ng mga residential area, paaralan at iba’t ibang mga establisyemento.
Iginiit ng Pari na napapanahon na upang seryosohin ng pamahalaan ang kalagayan ng mga inosenteng sibilyan sa mga kalapit na komunidad ng mga paliparan sa pamamagitan ng pagsasaalang-alang sa kanilang kaligtasan mula sa anumang sitwasyon o sakunang panghimpapawid.
Ayon kay Fr. Flores, dapat ng pagtuunan ng pansin ng pamahalaan ang paghahanap ng alternatibong lugar kung saan mas may katiyakan ang kaligtasan ng lahat.
“This should serve as a wake-up call for the Philippines. NAIA Terminals 1, 2, and 3 are surrounded by dense communities, schools, and businesses. One accident could lead to an unspeakable tragedy. It’s time we seriously consider decongesting and decentralizing our air traffic. Developing new international gateways or fast-tracking alternatives like Bulacan or Sangley is not just about convenience, it’s about safety and foresight. Let’s not wait for disaster to happen.” Dagdag pa ni Fr. Flores.
Matatandaang ika-12 ng Hunyo, 2025 ng bumagsak sa residential area sa labas ng paliparan ang Air India Flight AI-171 ilang minuto matapos itong mag-take off mula sa Sardar Vallabhbhai Patel international airport.
Sa kabuuang 241 na mga pasahero ng eroplano ang nasawi habang iisang lamang ang nakaligtas sa naganap na trahedya, kung saan umaabot na rin sa 29 ang nasawing mga sibilyan matapos itong bumagsak sa isang medical college hostel sa residential area sa labas ng paliparan.
